بنجائی وزیر ریلوے شیخ رشید احمد نا اسلام آباد بالی پٹ آ میڈیا تون گپ و تران

وزیراعظم عمران خان اقوام متحدہ نا جنرل اسمبلی ٹی پاکستان و کشمیری تا حقی وڑاٹ نمائندگی ءِ کرے
بھارت پاکستان آ جلہو کرے تو اودے پبی ورندی تننگک
اسلام آباد۔ 29 ستمبر (اے پی پی) بنجائی وزیر ریلوے شیخ رشید احمد پارینے کہ وزیراعظم عمران خان اقوام متحدہ نا جنرل اسمبلی ٹی پاکستان و کشمیری تا حقی وڑاٹ نمائندگی ءِ کرینے، بھارت پاکستان آ جلہو کرے تو اودے پبی ورندی تننگک۔ داخیال آتا درشانی ءِ او یک شنبے نادے وزیراعظم عمران خان نا دورہ امریکہ غان پدی بننگ نا وخت آ اسلام آباد بالی پٹ آ میڈیا تون گپ و تران اٹی کرے۔ اوپارے کہ جنرل اسمبلی آن وزیراعظم عمران خان زبردست و تاریخی تران کرے، دا اونا زند انا یات گار تقریر اس ئس ہرانا عالم اسلام ہم ستاءِ کرینے۔ شیخ رشید احمد پارے کہ وزیراعظم دورہ امریکہ ٹی 100 آن زیات جہانی شخصیت آتون اوڑدہی کرے ہرا اسہ ریکارڈ اسے، اوجہانی راہشون تے پاکستان نا موقف ءِ جوان وڑاٹ پیش کرے۔ وزیر ریلوے پارے کہ وزیراعظم جنرل اسمبلی آن تران اٹی کشمیر آن بیدس عالم اسلام نا ایلو ویل آتا ہم ذکر ءِ کرے، عمران خان جہانی فورم آ مودی نا پڑدہ ءِ پاش کرے و اقوام عالم نا مون آ بھارتی ظلم و جبر ءِ تالان کرے۔ اسہ سوج اسے آ بنجائی وزیر پارے کہ دا حقیقت ءِ کہ جہانی تعلقداری تیٹی فائدہ غاتا رشتہ مریک ولے داہم حقیقت ءِ کہ وزارت خارجہ بھاز گچین وڑاٹ کاریم کرینے۔ اوپارے کہ وزیراعظم جنرل اسمبلی آن تران آن بیدس جہانی راہشون آتون اوڑدہی تیٹی کشمیر نا مقدمہ ءِ بھاز جوان وڑاٹ پیش کرے، پاکستان کن دا زند و مرک انا ہند اس ئس، اللہ نا فضل اٹ وزیراعظم پاکستان نا دورہ بے کچ سرسہب مس۔ اوپارے کہ اگہ بھارت پاکستان آ جلہو کرے تو اودے پبی ورندی تننگک۔ اونا پاننگ ئس کہ پاکستان ءِ تینا دفاع نا حق دوئی ءِ، اگہ بھارت پاکستان آ جلہو کرے تو روایتی جنگ مفک و بھارت ءِ دانا بھرم ءِ کنوئی تمک۔