گورنر خیبر پختونخوا شاہ فرمان نا اسلام آباد بالی پٹ آ میڈیا تون گپ و تران

وزیراعظم عمران خان اقوام متحدہ ٹی قوم و کشمیری الس نا حقی نمائندگی ءِ کرے، اونا تران آن ایلو مسلمان راہشون و ملک آتے ہم حوصلہ ملا
اسلام آباد۔ 29 ستمبر (اے پی پی) گورنر خیبر پختونخوا شاہ فرمان پارینے کہ وزیراعظم عمران خان اقوام متحدہ نا جنرل اسمبلی ٹی مچ آ قوم و کشمیری الس نا نمائندگی ءِ کننگ نا حق ءِ ادا کرے، اونا تقریر آن ایلو مسلمان راہشون و ملک آتے ہم حوصلہ ملا، وزیراعظم نا دورہ بے کچ سرسہب مسنے۔ داخیال آتا درشانیءِ او یک شنبے نادے اسلام آباد بالی پٹ آ میڈیا تون گپ و تران اٹی کرے۔ گورنر پارے کہ اسہ مسلمان راہشون اسے نا ہراوڑنا کڑد اس مرے وزیراعظم عمران خان جابر نا مون آ کلمہ حق پارسا او کڑد ءِ ادا کرے، وزیراعظم نا تقریر، تقریر اس ئس، اونا تقریر آن ایلو مسلمان راہشون و ملک آتے ہم حوصلہ ملانے۔ گورنر پارے کہ وزیراعظم مسلم امہ ءِ باور کرفے کہ نن تون وسیلہ ارے، اگہ نن خوف آن پیش تمن تو ننا ویل آک ایسر مریرہ۔ اونا پاننگ ئس کہ وزیراعظم مچ آ قوم و کشمیری الس نا گچین وڑاٹ ترجمانی ءِ کرے و اونا دورہ سرسہب مس۔ اوپارے کہ وزیراعظم دیکی ملک آتا مون آ سہی منظرنامہ اس پیش کرے و اوفتے پارے کہ پاکستان کون آ ملک آتیان دُزی مروک آ پیسہ غاتے داملک آتے ٹی رکھ تننگک۔ شاہ فرمان پارے کہ کشمیر آ وزیراعظم پاکستان مچ آ قوم انا ترجمانی ءِ کرینے۔