اسلام آباد۔ 28ستمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ پاکستان آن اولیکو وار امت مسلمہ ءِ عمران خان نا دروشم اٹ لیڈرشپ اس دوبسنے، مچ آ مسلم امہ اینو اونا کنڈاہُننگ ءِ، وزیراعظم پیدوار کرے کہ فلسطین نا ویل انا ایسری اسکان اسرائیل ءِ امنا کپنہ، آجوئی مارچ کروک آک وزیراعظم نا دوتیان بایدے بُک ہلیر، 2023ء اسکان کھرب آ روپئی نا وام ایس ایم ایز نا کمک اٹ حقدار بندغ آتے تننگک، مستین نا حکمرانک ملک ءِ وام تا دلدل اٹ بٹیر، ملک انا 52درسد آبادی زالبول آتیا تالان ءِ کو معاشی شونداری کن اوفتے کڑد ادا کروئی مریک، حکومت زالبول آتے واکدار کننگ کن ہروڑگام گیج کیک۔ ہفتہ نادے سیالکوٹ اٹی دود آن تران کرسا ڈاکٹر فردوس عاشق اعوان پارے کہ گورنر اسٹیٹ بینک رضا باقر قائد اعظم ؒ نا ہمو سپاہی ءِ ہرا قائد نا تغ تا تعبیر کن پیشن نا ملک آن لکھ آ ڈالر تنخواہ ہلسا تینا دھرتی نا خذمت ءِ کننگ پاکستان آ بس اودے خراج تحسین پیش کینہ، دا سیمینار نا اڈتننگ آ اونا منتظمین آتے ہم خراج تحسین پیش کینہ ہرافک وزیراعظم پاکستان نا ریاست مدینہ نا عزم و سوچ انا پوروی نا کنڈا گام ہرفیر، ریاست مدینہ ٹی شونداری و شونہالی نا سفر اٹی زالبول آک ہم بشخ دار ئسر۔
