پاکستانی قوم ہمو وخت اسکان آرام اٹ تولپک ہراوخت اسکان کشمیری تے اوفتا حق خودارادیت تننگپ،وزیراعظم عمران خان

نیویارک۔ 28 ستمبر (اے پی پی) وزیراعظم عمران خان دا عزم انا درشانی ءِ کرینے کہ پاکستانی قوم ہمووخت اسکان آرام اٹ تولپک ہراوخت اسکان کشمیری تے اوفتا حق خودارادیت تننگتنے، چائے ننے انت کہ قیمت اس تروئی تمے، داہیت ءِ او امریکی ہردے ئی میٹرونیویارک اٹی شینک مروک آ تینا اسہ آرٹیکل اسے ٹی پارے۔ اوپارے کہ داسہ دنیا ءِ دا فیصلہ کروئی مریک کہ انسانی قدر و اخلاقیات ءِ لتاڑنگ کن ہراوخت اسکان سیاسی و اقتصادی خودغرجی تا سیبو ءِ ہلنگسا کیک۔ اوپارے کہ پاکستانی قوم کشمیری تے حق خودارادیت تننگ اسکان آرام اٹ تولپسہ داڑکن اوفتے چائے انت کہ قیمت اس تروئی تمے۔ اوپارے کہ دا تحریر نا مسخت مقبوضہ جموں و کشمیر اٹی بھارتی کوزہ گر فوج انا محاصرہ ٹی 80 لکھ کشمیری تا حالیت زار نا بابت جہانی برادری نا ضمیر ءِ سرفوئی ءِ۔ اواسہ وار ولدا دا عزم انا درشانی ءِ کرے کہ پاکستان امن نا خواہندار ءِ و دا امن ءِ شرف نا بنداو آ خواہک۔ اوپارے کہ پاکستان دہائی تیان ایسر نا چاری دا ویل ءِ پروقار وپرامن وڑاٹ ایسر کننگ نا خواہندار ءِ ہرا انسانی المیہ نا بدنما دروشم اس اختیار کرینے۔ اوپارے کہ پلواما واقعہ غان پد ایٹمی لائخی تخوک سویلی ایشیا ٹی جارحانہ گام گیج ہرفنگا و پاکستان نا کنڈآن امن ناعظیم نصب العین کن بھارتی پائلٹ نا یلہ کننگ آن پد ڈیہہ آن جنگ انا جمبر آتے مر کننگا۔ اوپارے کہ 5 اگست آن پد بھارتی حکومت نا کنڈآن کشمیری تا برخلاف نام نہاد آئینی چال اس چلیفنگا ہرانا برخلاف مچ آ دنیا ٹی برانزی مچی بناکرے۔ پاکستان بھارت نا کنڈآن کروک آ دا بھلا ناانصافی نا ایسری کن جہانی برادری نا باضمیر باسک آتون رابطہ کرے۔ مچ آ دنیا ٹی بھارت نا دا گام گیج نا مذمت ءِ کننگ انگ ءِ وخت اس کہ چندی راج بھارتی گام گیج آتا برخلاف تینا ناراضگی نا درشانی ءِ کننگ ءُ۔ 5 اگست 2019ء آ بھارت نا جارحانہ گام گیج آن پد مقبوضہ کشمیر اٹی کرفیو نافذ و ودکی بھارتی فوجی تا تعیناتی کننگا ہراڑا جہانی میڈیا، انسانی حق انا جہانی تنظیمک و بھاز انگا ایلو جہانی راہشونک مقبوضہ کشمیر اٹی بھارتی محاصرہ ٹی 80 لکھ کشمیری تا حالیت زار و پاکستان و بھارت نا نیام اٹ ودوک آ بے چیٹی آ تینا گڑتی نا درشانی ءِ کریر ولے گڑاس بندغ انسانی حق آتا خلاف ورزی تا برخلاف عالمگیر انسانی ہمدردی آ تینا کاروبار و واپار ءِ اولیت تسر۔ اوتینا تحریر اٹی پین پارے کہ اسہ وار تینا پسند نا داپالیسی ءِ دہرائفنگ انگ ءِ ہرا جنگ عظیم دوم نا سوب جوڑ مس۔ اوپارے کہ سوج دا ودی مریک کہ انت ایٹمی ٹیکنالوجی نا مننگ تون جہانی برادری جنگ عظیم کون آ حالیت آتے کن تیار ءِ۔ وزیراعظم عمران خان تینا تحریر اٹی مستی پارے کہ جہانی راہشون خاص کر امریکی صدر ڈونلڈ ٹرمپ سویلی ایشیا ٹی امن نا بابت کشمیر نا ویل انا حساسیت آن جوانی اٹ معلومدار ءِ۔ اوپارے کہ اوفتے تون اوڑدہی ٹی و کیہی ایلو وارخواہی تیا امریکی صدر ٹرمپ انا کنڈآن ثالثی نا سلہ غان پاش مریک کہ او دا بارواٹ بخوبی معلومدار ءِ کہ پاکستان و بھارت نا نیام اٹ کشمیر نا ویل انا بابت ہروڑنا بے چیٹی نا بے کچ سنگین ءُ نتیجہ دوئی مریک ہرانئے بیرہ پاکستان و بھارت اسکان محدود مریک بلکن داڑان مچ آ دنیا زہمی مریک۔ اودنیا ءِ پارے کہ کشمیر نئے بیرہ علاقائئی تنازعہ ءِ بلکن دا اقوام متحدہ نا سلامتی کونسل نا کنڈآن کشمیری الس ءِ حق خودارادیت تننگ نا بابت داوخت اسکان پورو کپروک آوعدہ غاتا کہانی ءِ ہرافتے بھارت نا مسکوہی وزیراعظم جواہر لعل نہرو ہم امنا کریسس۔