اقوام متحدہ۔ 28 ستمبر (اے پی پی) وزیراعظم عمران خان پاکستان آ پدی بننگ کن ہفتہ نا دے پیشیم آ کمرشل جہاز انا کمک اٹ ریاض اکن رادہ مس، تدوک آ نن اونا خصوصی جہاز فنی خرابی نا سوب نیویارک آ پدی ہناسس ہراکان او کمرشل جہاز انا کمک اٹ رادہ مسنے۔ وزیراعظم عمران خان تون اوار وزیر خارجہ شاہ محمود قریشی و سیکرٹری خارجہ سہیل محمود ئسک ہم اریر ءِ نیویارک نا کینیڈی بالی پٹ آ اقوام متحدہ ٹی پاکستان انا سفیر ملیحہ لودھی الوداع کرے۔ خصوصی جہاز ہرا سعودی حکومت اونا صوابدید آ گدریفیسس ٹی جمعہ نا شام فنی خرابی ودی مس ٹیکنیشنز فنی خرابی ءِ مر کننگ نا کوشست کرے ولے کننگ کتوس، اوکان پد اودے نیویارک آ پدی دڑفنگاسس۔ کمامدارآک پاریر کہ اوکان پد روز ویلٹ ہوٹل ہراڑے وزیراعظم نیویارک نا 7 دے ئی دورہ ٹی اڈ کریسس، ہِننگ نا فیصلہ کننگا و ہفتہ نا سہب پدی بننگ نا سفر کن سعودی ایئر لائن نا باقاعدہ جہاز اس دوئی کننگانے۔ انتئے کہ وزیراعظم زمی جمب آن زہمی علاقہ غاتا دورہ و زہمی خاہوت آتون اوڑدہی کن فکر مند ءِ۔ ”کشمیر مشن“ اٹی پاکستانی ڈل انا کماشی ءِ کرسا وزیراعظم عمران خان اقوام متحدہ نا جنرل اسمبلی نا 74می دیوان اٹی بشخ ہلک و جنرل اسمبلی نا 193باسک آتیان تران کرے و اقوام متحدہ نا خصوصی سروک دیوان آتے ٹی ہم بشخ ہلک۔ جنرل اسمبلی نا دیوان اٹی امریکی صدر ڈونلڈ ٹرمپ اتون اوار جہانی راہشون آتون جتا اوڑدہی کرے و تھنک ٹیکنس آن تران کرے و جہانی میڈیا تون ہم گپ و تران کرے۔
