نیویارک۔ 28 ستمبر (اے پی پی) وزیراعظم عمران خان پارینے کہ پاکستان سرسہبی اتون دنیا ءِ کلہو تسنے و اوفتیا زور شاغانے کہ بھارتی فوج 80 لکھ کشمیری الس آ محاصرہ نا نوٹس ءِ ہلے۔ اسہ ہفتہ نا دورہ امریکہ ءِ پورو کننگ آ وطن آ پدی بننگ آن مست میڈیا تون گپ و تران کرسا وزیراعظم پارے کہ مچ آ قوم دعاگو ئس و اللہ نا شکر گزار اُن ہراڑکن نن داڑے بسوسن نن ہمو کلہو ءِ سرکرینن۔ وزیراعظم ہراتینا ڈل انا کماشی ءِ کرسا اقوام متحدہ نا جنرل اسمبلی نا 74می دیوان اٹی بشخ ہلک قوم ءِ پارے کہ دا جہد برجاسلک۔ اوپارے کہ الس ءِ مایوس و فریشان مننگ نا ضرورت اف ہر جہد اٹی شیف و بڑزی بریک۔ اوداعزم انا درشانی ءِ کرے کہ او 80 لکھ کشمیری الس آ جاری جبر و استبداد نا کلہو ءِ سرکرینے و اقوام متحدہ، امریکہ و روس اتون اوار دنیا نا غٹ طاقت آک دادے جوان وڑاٹ پہہ مسنو۔ پاکستان اٹی بالی پٹ آ بیابخیر کن چاری خلقت کن تینا کلہو اٹی وزیراعظم پارے کہ او اللہ تعالیٰ نا شکر گزار ءِ ہراکنے دا شرف ءِ تسنے۔ وزیراعظم ہرا جمعہ نا نن رادہ مسوسس خصوصی جہاز اٹی فنی خرابی نا سوب آن پدی نیویارک آ ہناسس و تکنیکی ٹیم دا خرابیءِ مر کننگ کتو ہرانا سوب آن وزیراعظم ءِ پین اسہ نن اس ہوٹل اٹ اڈ کروئی تما۔
