پاکستان اٹی ہندی کہول آ سولر پینل تیار کننگ نا چرجوئی بایدے بناکے، پاکستان دنیا نا پنچ میکو بھلا ملک ءِ
کراچی ۔ 28 ستمبر (اے پی پی) صدر مملکت ڈاکٹر عارف علوی پارینے کہ شمسی توانائی اڑزان انگا توانائی نا دوئی کننگ نا ذریعہ ءِ ، پاکستان اٹی ہندی کہول آ سولر پینل تیار کننگ نا چرجوئی بایدے بناکے، پاکستان دنیا نا پنچ میکو بھلا ملک ءِ ننے تینا چناتے جہانی حدت نا خطرہ غاتابابت معلومدار کروئی مریک ۔ پاکستانی دنیا ٹی خیرات کروک آ ملک آتے ٹی سرفہرست ءِ ۔ ہفتہ نادے کراچی ٹی اڈ ہلوک آ دود آن تران کرسا صدر مملکت پارے کہ شمسی توانائی آن 10 ہزار اُراتے روشنا کننگ نا گام گیج نا ستاءِ کینہ ۔ دا اسہ خیر انا کاریم اسے و داٹی دعاملک، اللہ تعالیٰ ہرانا رزق ءِ بھلن کیک او اوفتیان خیرات کیک و ہندا خیرات اصل میرات ءِ ۔ اوپارے کہ او تدوک آ قومی اسمبلی ٹی مسلم لیگ (ن) نا تینا اسہ قومی اسمبلی نا باسک سنگت اسے نا کزیت آ اونا چناتے تون ہڑزخواہی کریکہ تو اوفتے پارے کہ اصل میرات مال و دولت اف بلکن نما باوہ نا جوان اخلاق و نیکیک ءُ ۔ اوپارے کہ خیرات کننگ نا بابت کراچی نا شار مچ آ پاکستان اٹی سبقت دروک آ شار ءِ و کراچی نا خلقت غٹ آ سبقت دروک آ خلقت مسنو ۔ اوپارے کہ ریاست تینا بنداوی زمواری تے پورو کننگ کتو ہرانا سوب آن خلیج ودا ہرانا سوب آن ایدھی کون آ خلقت مون آ بس و سیلانی کون آ ویلفیئر ٹرسٹ جوڑ مس ۔ صدر مملکت پارے کہ پاکستانی قوم اسہ حساس ءُ قوم اسے و دافتے ٹی بھاز زیات جوزہ ءِ ، جی سولر و گرین کریسنٹ اواری اٹ شمسی توانائی آن روشنائی تالان کننگ ءُ، سولر توانائی نا اڑزان انگا ذریعہ ءِ ۔ اوپارے کہ آبی کوڑی جوڑ کننگ داسہ ماحولیات آہم بھلو بھاریم اسے ولے آبی کوڑیک دیر کوڑی کننگ کن جوڑ کننگ نا جواز ساڑی ءِ ۔ رن آف ریور پروجیکٹ و ڈیم آن بجلی نا دوئی کننگ ممکنات آتیان ءُ ۔ اوپارے کہ او نجی بشخ آن خواست کیک کہ او ملکی کہول آ سولر پینل تیار کننگ نا چرجوئی ءِ بنا کے اگہ نن ار ب آ روپئی موبائل فون تیا خڑچ کننگ کینہ تو دابشخ آانتئے کننگ کپنہ ۔
