اقوام متحدہ ۔ 28 ستمبر (اے پی پی) وزیراعظم عمران خان و اونا ڈل ءِ اتوک آ جہاز اٹی فنی خرابی نا سوب آن وزیراعظم پدی نیویارک آ ہنا، فنی خرابی نا سوب جہاز ءِ جمعہ نا نن پدی نیویارک بالی پٹ آ دڑفنگا ۔ سعودی حکومت نا کنڈآن وزیراعظم ءِ تروک آ خصوصی جہاز جمعہ نا شام نیویارک نا جان ایف کینڈی بالی پٹ آن بال کرے ولے بال کننگ نا اِراگھنٹہ غان پد جہاز اٹی فنی خرابی ودی مس ۔ اقوام متحدہ ٹی پاکستان نا سفیر ملیحہ لودھی ہرا داکان مست وزیراعظم ءِ سپاراسس جہاز اٹی فنی خرابی نا سوب پدی بالی پٹ آ سرمس ۔ وزیراعظم اقوام متحدہ نا جنرل اسمبلی نا 74می دیوان اٹی بشخ ہلوک آ پاکستانی ڈل انا کماشی ءِ کریکہ ۔ نیویارک بالی پٹ آ پدی بننگ آ او بالی پٹ آ زرس اڈ کرے تانکہ فنی خرابی ءِ مر کننگ مرے ولے داڑکن زیات وخت درکار ئس ، جہاز ءِ جوڑ کننگ نا کاریم ہفتہ نا سہب اسکان پورو کننگک ۔ ہموکان ملیحہ لودھی وزیراعظم ءِ ہرفے روزویلٹ ہوٹل آ سرمس ہراڑے اوفک تینا ہفت دے ئی تاریخی دورہ امریکہ ٹی اڈ کریسس ۔ کمامدارآک پاریر کہ اگہ سہب اسکان جہاز انا فنی خرابی مر کننگ متو تو وزیراعظم پاکستان پدی ہِننگ کن کمرشل فلاءٹ اٹ سفر کیک انتئے کہ اووطن آ پدی برسا زمی جمب آن زہمی علاقہ و خاہوت آتون اوڑدہی کن بے چین ءِ ۔ نیویارک نا تینا دورہ ’’مشن کشمیر ‘‘ اٹی وزیراعظم عمران خان اقوام متحدہ نا 193باسکی اسمبلی آن تران کرے، داکان بیدس او اقوام متحدہ نا چندی دیوان تیٹی بشخ ہلک، چندی جہانی راہشون آتون اوڑدہی تتون اوار اوار امریکی صدر ڈونلڈ ٹرمپ اتون ہم اوڑدہی کرے ۔ داوخت آ وزیراعظم کیہی تھنک ٹینکس آتیان تران کرے و جہانی میڈیا ءِ کیہی انٹرویوہم تس ۔
