میر پور۔ 25ستمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان ءِ آزاد کشمیر اٹی زمی جمب آن مروک آ جانی ومالی نسخان تا سرجم رپورٹ ءِ اینو ہی مون تننگک، نسخان تا جاچ ءِ ایس ڈی ایم اے نا سروے آن ہلنگک، غٹ زہمی ہرافتا جانی و مالی نسخان مسنے حکومت پاکستان اوفتا آبادکاری و بحالی کن ہروڑنا آسراتی فراوان کیک۔ او چارشنبے نادے آ میر پور نا علاقہ جاتلاں ٹی این ڈی ایم اے نا چیئرمین لیفٹیننٹ جنرل افضل تون اوار میڈیا ءِ بریفنگ تسکہ۔ وزیراعظم نا خصوصی کمکار ڈاکٹر فردوس عاشق اعوان پارے کہ حکومت آزاد کشمیر تون اواری اٹ کشمیر اٹی زمی جمب آن مروک آ بھس کاری تا جاچ ءِ ہلنگ ءِ۔ اوپارے کہ وزیراعظم عمران خان نا پارت آ زمی جمب اٹی شہید مروک آتا خاہوت و ٹھپی تتون یکجہتی نا درشانی ءِ کننگ کن میر پور تون اوار غٹ زہمی علاقہ غاتا دورہ غا بسونٹ اوپارے کہ مشکل نا داساہت اٹی کشمیری ایڑھ ایلم تتون سلوک اُن، اوپارے کہ وزیراعظم آزاد کشمیر راجہ فاروق حیدر تون اینو اوڑدہی کرینٹ ہہراٹی زمی جمب نا زہمی علاقہ غاتے ٹی ریسکیو و ریلیف آپریشن نا بابت گپ و تران کننگانے۔ داہم فیصلہ کننگانے کہ ہچ ءُ متوازی پنجر اس سلفنگپک بلکن آزاد کشمیر نا محکمہ رینیو و ایس ڈی ایم اے تون اواری اٹ ریسکیو و ریلیف سرجزآتے مربوط کننگک۔ اوپارے کہ داسانحہ ٹی ہم پاک فوج و این ڈی ایم اے نا کلیدی ءُ کڑد اس مسنے، این ڈی ایم اے غٹ اسٹیک ہولڈرآتے شریدار کرسا تینا کاریم ءِ مون آ دننگ ءِ۔
