اسلام آباد۔ 25ستمبر (اے پی پی) قائم مقام اسپیکر قومی اسمبلی قاسم خان سوری پارینے کہ گچین ءُ راج اسے نا ٹہیفنگ کن فیس بک میڈیم اہم ءُ کڑد اس ادا کننگ کیک ولے دا میڈیم ءِ کس اسے نا است آزاری کن بایدے کاریم اٹ اتنگپ و مذہبی جوزہ غاتے جبی تروک آ مواد آتا سدباب کن بایدے کانود سازی اس مرے تانکہ بندغ اسے نا یا ادارہ سے نا نسخان مف۔ چارشنبے نادے آ داڑے پاکستان انسٹیٹیوٹ آف پارلیمنٹری سروسز اٹی فیس بک نا کنڈآن سوشل میڈیا ورکشاپ آن تران کرسا قائم مقام اسپیکر قاسم خان سوری پارے کہ ورکشاپ نا اڈتننگ ستاکڑزک۔ اوپارے کہ وزیراعظم نا ای گورننس نا ویژن ءِ ہم سوشل میڈیا نا کمک اٹ ایسر اسکان سرکننگ مریک۔ اوپارے کہ نن سوشل میڈیا نا کمک اٹ تینا گچین کاری مہم ءِ چلیفین داڑان خلقت اٹی آگاہی بس، کنکون آ لس بندغ ہم ڈپٹی اسپیکر نا عہدہ غا فائز مسنے۔ اوپارے کہ تھری جی و فور جی نا بننگ آن پد سوشل میڈیا لس مس و داڑان خلقت ءِ زبان ملا و او تینا توار ءِ بڑز کننگ نا قابل مسر۔ اوپارے کہ دنیا نا بھاز بھلو آبادی اس سوشل میڈیا نا کمک اٹ اسہ ایلو تون گنڈنگانے۔ پاکستان نا بھاز انگا ویل آک داڑان تالان مسر۔ اوپارے کہ مقبوضہ کشمیر نا 80 لکھ الس قلابند ءُ، ہموڑے انفارمیشن بلیک آؤٹ ءِ، دنیا ٹی کس ءِ دا سمااف کہ اوڑے انت مننگ ءِ۔ اوپارے کہ فیس بک و انسٹاگرام آجوئی اظہار رائے نا بایدے شرف ءِ کیر، فیس بک ترندی اٹ تالان مروک آ نیٹ ورک ءِ، فیس بک بایدے مظلوم تا توار جوڑ مرے۔
