میر پور۔ 25ستمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا پارت آ پاک فوج، این ڈی ایم اے تون اوار سانحہ غاتون مون تروک آ غٹ ادارہ غاک میر پور اٹی ریسکیو و ریلیف آپریشن اٹی زیات آن زیات بشخ ہلنگ ءُ، اینو ننا غٹ انا امتحان ءِ، ہراتم کہ قوم آ مشکل وخت یا قدرتی آفت بس و مچ آ قوم یکجا مریک، اسہ وار ولدا 22 کروڑ الس آزاد کشمیر زمی جمب اٹی 2005ء والا جوزہ ءِ دہرائیفنگ ءِ، حکومت پاکستان زمی جمب نا زہمی تا بحالی، مالی نسخان نا ازالہ ءِ کننگ کن تینا پبی کڑد ءِ ادا کیک، وزیراعظم ءِ نسخان تا بابت وخت وخت انا رپورٹ ءِ گدریفنگ انگ ءِ۔ او چارشنبے نادے آ ڈویژنل ہیڈ کوارٹر ٹیچنگ ہسپتال میر پورا ٹی ٹھپی تا جان پڑسی ءِ کننگ آن پد صحافی تتون گپ و تران کریکہ۔ پاکستان بیت المال نا چیئرمین عون عباس پبی، میڈیکل سپرنٹنڈنٹ، اسسٹنٹ کمشنر میر پور ہم داوخت آ ساڑی ئسر۔ ڈاکٹر فردوس عاشق اعوان پارینے کہ دا است ہسون المیہ غا وزیراعظم عمران خان نا خصوصی پارت آتیا میر پور نا دورہ ءِ کننگ اُٹ۔ میر پور نا زمی جمب زہمی تتون وزیراعظم عمران خان و 22کروڑ الس نا کنڈآن است ہسونی نا درشانی ءِ کیوہ۔ اوپارے کہ آزاد کشمیر نا الس پاکستان نا درستی راستی و نہادی میرات ءُ۔ اوپارے کہ وزیراعظم عمران خان زمی جمب نا حوال ملنگ تون پاک فوج، این ڈی ایم اے و ریسکیو ادارہ غاتے دمدستی وڑاٹ میر پور نا وزہمی علاقہ غاتے ٹی سرمرسا اولیکو مرحلہ ٹی ریسکیو، ارٹ میکو مرحلہ ٹی ریلیف و مسٹ میکو مرحلہ ٹی بحالی کن گام گیج ہرفنگ نا پارت کرینے۔ غٹ ادارہ غاک وخت آ میر پور نا زہمی علاقہ غاتے ٹی سرمرسا تینا تینا زمواری تے ادا کننگ نا بناءِ کرینو۔ این ڈی ایم اے تون اوار اوار پاکستان بیت المال نا ٹیم ہم زہمی علاقہ غاتے ٹی ساڑی ءِ۔ امداد سرجزآتے ٹی ننا اولیت ءِ کہ اسہ جاگہ اس ہندن ءُ مف کہ ہراڑے امدادی سرجز مف۔ اسہ حکمت عملی و رابطہ غاتا کمک اٹ مون آ ہِننگ اُن۔ اوپارے کہ تدوک آ دے ہراتم دا زمی جمب بس تو ہمووخت آ ای سوشل میڈیا تربیتی ورکشاپ آن تران کریٹہ۔ بشخ ہلوک آتا حوصلہ ءِ ودفنگ کن ای ہراہیت ءِ کریٹ اودے اسہ خاص ءُ جماعت اسے نا میڈیا سیل پیڑ ترسا زمی جمب تون گنڈار ہرانا ای ترندی اٹ مذمت ءِ کیوہ۔ خاص ءُ سیاسی جماعت اسے نا میڈیا سیل انا کنڈآن سوشل میڈیا غا ٹاپ ٹرینڈ کرسا زمی جمب زہمی تا ٹھپ آتیا بے چٹ تننگا ہرا است ہسون ہیت اسے۔ مچ آ قوم انا یکجا مننگ نا وخت ءِ۔ اسہ مشکل ءُ حالیت اسے ٹی سیاست آن ایڑتر مرسا کشمیری ایڑھ ایلم تتون سلنگ نا وخت ءِ۔ اوپارے کہ اقوام متحدہ نا جنرل اسمبلی ٹی وزیراعظم عمران خان کشمیری تا موقف نا ترجمان ءِ کننگ کن مچ آ دنیا نا سرکڑدہ غاتون ہیت کننگ ءِ و دنیا ءِ پاننگ ءِ کہ مقبوضہ کشمیر اٹی 51دے آن بھارتی ریاستی دہشت گردی ترند مسنے۔ داحالیت آتا خواست دادے کہ میڈیا تون اوار غٹ سیاسی جماعت آک، سول سوسائٹی زموار کڑد ادا کیر۔ بیان بازی نا جاگہ غا غٹ ءِ آسانی تیکن کڑد ادا کروئی مریک۔
