چین اتون ہڑتوم آ کنڈآتا کمکاری پاکستان نا خارجہ پالیسی ٹی اہم ءُ ہند اس تخک، چیئرمین سینیٹ

اسلام آباد۔ 25ستمبر (اے پی پی) چیئرمین سینیٹ صادق سنجرانی پارینے کہ چین اتون ہڑتوم آ کنڈآتا کمکاری پاکستان نا خارجہ پالیسی ٹی اہم ءُ ہند اس تخک، پاک چین سنگتی اقتصادی شریداری ٹی پترینگانے۔ داہیت ءِ او چارشنبے نادے آ چین نا سفیر تون اوڑدہی ٹی گپ و تران کرسا پارے۔ چیئرمین سینیٹ پارے کہ پاکستان نا حکومت، پارلیمان و الس پاکستان چین سنگتی ءِ قدر انا نظر اٹ ہریرہ۔ اوپارے کہ ڈیہہ نا شونداری و شونہالی ہڑتوم آتا اسیجا وژن ءِ، ایشیاء اقتصادی نقل و حرکت نا وت مننگ ءِ و چین نا کڑد ڈیہہ ٹی بے کچ اہم ءِ۔ اوپارے کہ پاکستان و چین ہر مشکل وخت اٹی اسہ ایلو تون تفیر، ہڑتوم آ ملک آتا نیام اٹ جہانی فورم تیا کمک بے مٹ ءِ۔ اوپارے کہ پاکستان ون چائنہ پالیسی آ سلوک ءِ، چین پاکستان نا اہم ویل آتیا پاکستانی موقف نا تائید ءِ کرینے۔ اوپارے کہ پت انا رشتہ وخت اتون اوار اوار پین سوگو مننگ ءِ، ادارہ جاتی کمک و پارلیمانی ڈل آتا ہن وبر اٹی پین ترندی اتوئی مریک۔