زمی جمب نا سوب آن مروک آ نسخان تیا گپ و تران کرے
اسلام آباد۔ 25ستمبر (اے پی پی) چیئرمین سینیٹ محمدصادق سنجرانی آزادکشمیر نا وزیراعظم راجہ فاروق حیدر خان ءِ ٹیل فون کرے و آزاد کشمیر نا چندی علاقہ غاتے ٹی زمی جمب نا سوب آن مروک آ نسخان تا بابت گپ و تران کرے۔ چیئرمین سینیٹ وزیراعظم آزاد کشمیر ءِ ہروڑنا کمک فراوان کننگ نا باوری کرفے۔ چیئرمین سینیٹ پارے کہ تعلقدار ادارہ غاک دمدستی وڑاٹ زہمی بندغ آتے ہروڑنا امداد نا فراوانی کن گام گیج کیر۔ اوپارے کہ الس نا آگاہی کن معلوماتی ہند و ہیلپ لائن اس جوڑ کننگے و بنجائی وصوبائی حکومت آک آزاد کشمیر تون اواری اٹ امدادی سرجزآتے ٹی بشخ ہلیر۔ چیئرمین سینیٹ زمی جمب اٹی زوال کروک آ بندغ آتے کن بخشش نا دعا و ٹھپی مروک آتا زوت جان جوڑی کن دعا کرے و غمزدہ خاہوت آتون ہڑزخواہی کرے۔ ڈپٹی چیئرمین سینیٹ سینیٹر سلیم مانڈوی والا، قائد ایوان سینیٹ سینیٹر سید شبلی فراز، قائد حزب اختلاف سینیٹ سینیٹر راجہ محمد ظفر الحق ئسک ہم آزاد کشمیر اٹی زمی جمب اٹی مروک آ جانی و مالی نسخان تیا ڈکھ و است ہسونی کرسا زہمی خاہوت آتون ہڑزخواہی کرینو۔
