وزیراعظم عمران خان و ترکی نا صدر رجب طیب اردوان نا نیام اٹ نیویارک اٹی اوڑدہی

نیویارک۔ 24ستمبر (اے پی پی) پاکستان و ترکی غٹ چیلنج آتا مقابلہ ءِ کننگ کن اسہ ایلو تون ہم کوپہ سلنگ نا عزم انا درشانی ءِ کرینو۔ دا عزم انا درشانی ءِ تدوک آدے نیویارک اٹی یو این جنرل اسمبلی دیوان نا وخت آ ترکی نا صدر رجب طیب اردوان و وزیراعظم پاکستان عمران خان نا نیام اٹ اوڑدہی ٹی کننگا۔ ترجمان دفترخارجہ نا رداٹ وزیراعظم عمران خان اینخو سال جنوری ٹی تینا ترکی نا دورہ نا ذکر ءِ کرسا داہیت آ است جمی نا درشانی ءِ کرے کہ پاک ترکی ہڑتوم آ کنڈآتا تعلقداری تین پہ تینی سٹریٹجک شریداری ٹی بدل مسنے۔ وزیراعظم اہم قومی است خواہی نا معاملہ غاتیا پاکستان نا پبی مخ تفی آ ترکی نا صدر نا منت واری ءِ ہرفے و اہم قومی و بین الاقوامی معاملہ غاتیا ترکی نا مخ تفی نا بابت پاکستان نا عزم انا درشانی ءِ کرے۔ وزیراعظم پارے کہ ہڑتوم آ کنڈآتا اقتصادی شریداری ءِ پین سوگو کننگ نا گرج آ زور شاغسا اومیت ظاہر کرے کہ ساڑی ہی ٹی پک مروک سٹریٹجک اکانومک فریم ورک دا چرجوئی ٹی اہم کڑدادا کیک۔ اوپارے کہ او صدر رجب طیب اردوان نا پاکستان نا دورہ نا شدت اٹ چاری ءِ۔ وزیراعظم عمران خان ترک صدر ءِ مقبوضہ کشمیر اٹی بھارت نا ساڑی آ اسہ کنڈی و غیر کانودی گام و تازہ حالیت آتا بابت بریف کرے و پارے کہ مقبوضہ جموں کشمیر اٹی آبادی نا تناسب ءِ بدل کننگ نا بھارتی کوشست جہانی کانود و یو این سلامتی کونسل نا قرارداد آتا منافی ءِ۔اومقبوضہ کشمیر اٹی دمدستی کرفیو و ایلو پابندی تے ہرفنگ و کشمیری الس ءِ حق خودارادیت تننگ نا خواست کرے۔