وزیراعظم عمران خان نا ایران نا صدر حسن روحانی تون اوڑدہی، وزیراعظم نا ایران تون گچین ہمسایہ گری نا تعلقداری تے پین سوگو کننگ، چندی بشخ آتے ٹی تین پہ تینی کمکاری ءِ ودفنگ نا پاکستان نا است خواہی نا درشانی ءِ کرے

نیویارک۔ 24ستمبر (اے پی پی) وزیراعظم عمران خان ایران نا صدر حسن روحانی تون اقوام متحدہ نا جنرل اسمبلی نا 74می دیوان نا وخت آ اوڑدہی کرے ہراٹی ہڑتوم آک ہڑتوم آ کنڈآتا تعلقداری و علاقائی پیش رفت آ گپ و تران کریر۔ وزیراعظم عمران خان اوڑدہی ٹی ایران تون گچین ہمسایہ گری نا تعلقداری تے پین سوگو کننگ و چندی بشخ آتے ٹی تین پہ تینی فائدہ غاتے ٹی کمکاری ءِ ودفنگ نا پاکستان نا است خواہی نا درشانی ءِ کریر۔ وزیراعظم ایرانی سرکڑدہ خاص کر سپریم لیڈر آیت اللہ علی خامنائی نا کشمیری الس و اوفتا روا حق انا دوئی کننگ کن غیر مبہم مخ تفی آ منت واری ءِ ہرفے۔وزیراعظم ایران نا صدر تون بھارت نا کوزہ ٹی جموں و کشمیر اٹی بھارت نا اسہ کنڈی و علاقائی امن و سلامتی ءِ خطرہ ٹی بٹوک آ غیر کانودی گام گیج و ساڑی آ حالیت آتا بارواٹ ہم گپ وتران کرے۔ مقبوضہ جموں و کشمیر اٹی انسانی حق آتا بھلو کچ اسے آ خلاف ورزی تا بابت ہیت کرسا وزیراعظم مقبوضہ جموں و کشمیر اٹی نافذ کرفیو و تدوک آ 50 دے آن کودک کشمیری الس آ عائد کروک آ پابندی تے دمدستی وڑاٹ ہرفنگ نا گرج آ زور شاغا۔ اوڑدہی ٹی ہڑتوم آ کنڈآک وزیراعظم عمران خان نا اینخو سال دورہ ایران اٹی مروک آ ہڑتوم آ کنڈآتا معاہدہ غاتیا عملدرآمد نا رفتار ءِ ترند کننگ آہم امنا کریر۔