وزیراعظم عمران خان و امریکہ نا صدر ڈونلڈ ٹرمپ تینا اوڑدہی ٹی ہڑتوم آ ملک آتا نیام اٹ سوگو شریداری نا عزم انادرشانی ءِ کرینو

وزیراعظم صدر ٹرمپ نا جموں کشمیر نا ویل آ ثالثی نا ولدا سلہ نا ستاءِ کرینے، دفترخارجہ
نیویارک۔ 24ستمبر (اے پی پی) وزیراعظم عمران خان و امریکہ نا صدر ڈونلڈ ٹرمپ ہڑتوم آ ملک آتا نیام اٹ سوگو شریداری نا عزم انا درشانی ءِ کرینو۔ ہڑتوم آ راہشون تا اوڑدہی اقوام متحدہ نا جنرل اسمبلی نا دیوان نا وخت آ مس۔ دفترخارجہ آن جاری مروک آ بیان نا رداٹ وزیراعظم عمران خان صدر ٹرمپ نا کنڈآن جموں کشمیر نا ویل آ ثالثی نا ولدا سلہ نا ستاءِ کرینے۔ مقبوضہ جموں و کشمیر اٹی بھارت نا کنڈآن لاک ڈاؤن ءِ انسانی تنکی و علاقائی امن کن نسخان دہ گوندسا وزیراعظم مقبوضہ کشمیر اٹی دمدستی وڑاٹ کرفیو و ایلو پابندی تے ہرفنگ و سویلی ایشیا ٹی پائیدار امن و کشمیر نا ویل انا ایسری نا اہمیت ءِ تالان کرے۔ ہڑتوم آ راہشونک علاقہ ٹی امن و سلامتی نا حالیت آتا ہم جاچ ءِ ہلکر و پرامن و سوگو اوغانستان کن تینا اسیجا است خواہی نا درشانی ءِ کریر۔ وزیراعظم اوغان امن وخیر خواہی عمل نا زوت بنامننگ نا اومیت ظاہر کرے و پارے کہ اوغان تنازعہ نا ہچ ءُ فوجی ایسری اس اف۔ جولائی 2019ء ٹی وزیراعظم نا واشنگٹن نا سرسہب دورہ نا بابت ہڑتوم آ راہشونک واپار، زرکاری و توانائی نا تین پہ تینی وڑاٹ اولیتی بشخ آتے ٹی پیش رفت ءِ ترند کننگ نا عزم انا درشانیءِ کریر۔ تینا پریس کانفرنس اٹی وزیراعظم عمران خان امریکی صدر آ زور شاغا کہ او مقبوضہ کشمیر اٹی 50 دے آن جاری کرفیو ءِ ختم کرفے ہراڑے الس محصور و بنداوی آجوئی تیان محروم ءُ و او عشرہ غاتیان متکن دا تنازعہ نا ایسری کن کمک کے۔ اوپارے کہ دنیا ٹی غٹ آن زیات واکدار ملک مننگ نا ناطہ امریکہ نا زمواری ءِ کہ او مقبوضہ کشمیر اٹی سنگین تنکی نا چٹفنگ اٹ کمک کننگ نا فرض ءِ انجام ایتے۔ صدر ٹرمپ پارے کہ یقینا اگہ ہڑتوم آ حکومت آک پار تو پاکستان و بھارت نا نیام اٹ ثالثی ٹی کمک کننگ کینہ۔ اوپارے کہ او پاکستان آ پت کیک و کشمیر اٹی ہر اسٹ تون اسہ وڑنا سلوک نا خواہندار ءِ۔ امریکی صدر پارے کہ بھارتی وزیر اعظم نریندر مودی و وزیراعظم عمران خان تون اونا جوان ءُ تعلقداری اسے۔ اگہ او ہڑتوم آک پار تو ثالثی کن تیار اُٹ و او اسہ جوان ءُ ثالث اس ثابت مریک۔ اوغانستان نا بابت وزیراعظم عمران خان صدر ٹرمپ آ زور شاغا کہ او اوغان ویل انا سیاسی ایسری کن طالبان آتون دُوارہ مذاکرات نا بناءِ کے انتئے کہ دا ویل انا ہچ ءُ فوجی ایسری اس اف۔ اوغانستان اٹی سوگوی نا مطلب پاکستان اٹی سوگوی ءِ۔ صدر ٹرمپ پارے کہ او وزیراعظم عمران خان آ پت کیک و اودے تینا جوان انگا سنگت گوندا۔ صدر ٹرمپ علاقائی امن و شونداری کن وزیراعظم عمران خان نا سیاسی بصیرت و سرکڑدہ ہی کڑد انا ستاءِ کرے۔ ہوسٹن اٹی السی مچی آن بھارتی وزیراعظم نا تران نا بابت صدر ٹرمپ پارے کہ او پاکستان و وزیراعظم عمران خان آ پت کیک کہ او شونداری نا ہیت ءِ کیک۔ اوپارے کہ تینا اوڑدہی ٹی اوفک ہڑتوم آ ملک آتا نیام اٹ ہڑتوم آ کنڈآتا واپاری کچ ءِ ودفنگ آہم امنا کریر ہرا داوخت آ بھاز کم ءِ۔