وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا ٹویٹ

اسلام آباد۔ 24ستمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان گچین و باوقار وڑاٹ مظلوم کشمیری تا مقدمہ ءِ اقوام عالم نا مون آ پیش کننگ ءِ، چندی ملک آتا سروک آتون اوڑدہی تا وت تنازعہ کشمیر و اونا ساڑی سنگین حالیت آک ئسر، 80 لکھ کشمیری مقبوضہ دامان اٹی محصور ءُ، عمران خان دنیا ءِ باور کرفے کہ مقبوضہ جموں کشمیر اٹی انسانی تنکی ودی مننگ کیک ہراڑان امن عالم ءِ شدید خطرہ مون تروک ءِ۔ سے شنبے نادے آ تینا ٹویٹ اٹی وزیراعظم نا خصوصی کمکار ڈاکٹر فردوس عاشق اعوان پارے کہ وادی جنت اٹ مظلوم الس آ زند ءِ تنگ، گلی تے ویران وکوچہ و بازار آن سنسان ءُ۔ اوپارے کہ امریکی صدر ڈونلڈ ٹرمپ اتون اوڑدہی ٹی وزیراعظم مقبوضہ جموں و کشمیر اٹی کرفیو ءِ چٹفنگ آ زور شاغا،صدر ٹرمپ انا بیان ”وزیراعظم عمران خان و پاکستان آ پت ءِ“ و ڈیہہ ٹی امن کن ایران تون ہیت کننگ نا مینڈیٹ عمران خان نا قائدانہ لائخی و دنیا نا پاکستان آ ودوک آ پت انا اعتراف ءِ۔ اوپارے کہ وزیراعظم ایلو ملک آتا سروک، برطانیہ نا وزیراعظم بورس جانسن، ترکی نا صدر طیب اردوان، ایران نا صدر حسن روحانی و سوئٹزر لینڈ انا صدر اولی میور تون اوڑدہی تیٹی ہڑتوم آ کنڈآتا تعلقداری تا سوگوی، تین پہ تینی کمک ءِ مون آ دننگ نا اہمیت آ زور شاغا و مقبوضہ کشمیر اٹی انسانی حق انا خلاف ورزی تیان معلومدار کرے۔ عمران خان دنیا غا پیدوار کرے کہ علاقائی امن و سلامتی کن کشمیر نا ویل انا ایسری المی ءِ۔