بالا کوٹ اٹی ”دہشت گرد کیمپ انا بحالی“ نا بھارتی آرمی چیف انا دوبہ بے بنداو ءِ، ترجمان دفترخارجہ

اسلام آباد۔ 24ستمبر (اے پی پی) ترجمان دفترخارجہ بالاکوٹ اٹی ”دہشت گرد کیمپ انا بحالی“ نا بھارتی آرمی چیف انا دوبہ نابارواٹ میڈیا نا سوج اسے نا ورندی ءِ ترسا اونا سختی اٹ تردید ءِ کرے و دا بیان ءِ بے بنداو گوندانے۔ ترجمان زور شاغاکہ پاکستان آن ”دراندازی“ نا بھارتی دوبہ غاک دا جھنجلاہٹ و مایوسی آ مبنی کوشست آتا عکاس ءُ ہرا بھارت تینا کوزہ ٹی جموں و کشمیر اٹی کوزہ گر بھارتی فوج انا بیدادی و انسانی حق آتا بدترین لتاڑتیان دنیا نا چکار ءِ اسہ کنڈ کننگ کن کننگ ءِ۔ ترجمان پارے کہ داوڑنا بے کاٹم و دروغ دوبہ غاتا کمک اٹ بھارت جہانی برادری ءِ گمراہ کننگ کپک و نئے دا چم بازی تے اٹ بھارت تینا کوزہ ٹی جموں و کشمیر اٹی تینا بدترین ریاستی دہشت گردی ءِ ہی اودیم کننگ کیک۔ ترجمان داحقیقت نا کنڈا چکار کرفسا پارے کہ 2019ء ٹی بے خار بھارتی سیمی خلاف ورزی تیان بھلو کچ اسے آ جانی و مالی نسخان مس ہرافتے ٹی بیست و شش بے گناہ شہید و اسہ سد ءُ بیست و چار ٹھپی مسر۔ خورک و شرف آن محروم بھارتی بیان آک اونا چہرہ ءِ دنیا نا مون آ پین پاش کرینو۔ بھارت پورو شدت تون اقوام متحدہ نا فوجی مبصر پڑک ءِ تینا کاریم ءِ کننگ آن توننگ ءِ و اونا کارندہ غاتا آزادانہ ہن و بر آ قدغن خلکونے ہرا پاکستان نا طرزعمل آن یکسر برعکس ءِ، پاکستان اوفتے پورو نقل و حرکت نا آجوئی تسنے۔ بھارتی جنگی گنوکی آ مبنی رویہ و پرچار علاقائی امن و سلامتی کن سنگین خطرہ اسے۔ ننے اومیت ءِ کہ جہانی برادری دانا نوٹس ءِ ہلسا بھارت آ زور شاغک کہ او زمواری نا درشانی ءِ کے و دا گام گیج آتیان بس کے ہرا مست آن بے چیٹ چاگڑد ءِ پین خراب کننگ نا سوب مرے۔