انسانی حق کونسل اٹی کشمیر آ راستکی تے امنا کننگ پاکستان نا کوشست آتا امنائی ءِ،مقبوضہ کشمیر اٹی بھارتی بیدادی ءِ تالان کننگ نا جنیوا ٹی چلیفوک آ مہم نا برخلاف سوشل میڈیا کلہو آک بے بنداو ءُ، ترجمان دفترخارجہ

اسلام آباد۔ 24ستمبر (اے پی پی) دفترخارجہ نا ترجمان ڈاکٹر فیصل بھارت نا کوزہ ٹی جموں و کشمیر اٹی کوزہ گر بھارتی فوج انا است ہسون بیدادی ءِ تالان کننگ نا جنیوا ٹی چلیفوک آ پبی پاکستانی مہم نا برخلاف سوشل میڈیا غا بے بنداو کلہو آتے سختی اٹ مسترد کرینے۔ سے شنبے نادے آ اسہ سوج اسے نا ورندی ٹی ترجمان دفتر خارجہ سوشل میڈیا غا ہمو کلہو آتے مسترد کرسا پارے کہ دُن انگا منفی کلہو آتے تالان کننگ نا مسخت بھارت نا کوزہ ٹی جموں و کشمیر اٹی کوزہ گر بھارتی فوج انا انسانی حق انا سنگین پامالی تے تالان کننگ نا بابت جنیوا ٹی چلیفوک آ پاکستان نا سرسہب مہم نا اثر ءِ زائل کننگ نا مذموم کوشست ءِ۔ اوپارے کہ بھارت نا کوزہ ٹی جموں و کشمیر اٹی چار اگست آن نافذ مروک آ بدترین کرفیو آن پد آن داحالیت آک خاص وڑاٹ بے کچ مخدوش ءُ۔ ترجمان چندی ڈیہہ تا پنجا آن زیات ملک آتا اسیجا اعلامیہ ءِ تالان کرسا پارے کہ دااعلامیہ ٹی بھارت آن خواست کننگاکہ تینا کوزہ ٹی جموں و کشمیر اٹی نافذ کروک کرفیو/لاک ڈاؤن ءِ دمدستی ختم و پیلٹ گن آتون اوار واک انا کاریم اٹ اتنگ ءِ بند، غٹ سیاسی بندی تے دمدستی یلہ کننگے و 2018-19ء ٹی جموں و کشمیر نا بارواٹ جاری مروک آ اقوام متحدہ نا رپورٹ آتا سفارشات آتیا عملدرآمد کے۔ ترجمان پارے کہ انسانی حق کونسل اٹی کاریم اٹ بروک آ اسیجا اعلامیہ نا میکنزم انسانی حق کونسل نا باسک و بے باسک ملک آتا دا معاملہ ٹی اجتماعی توار نا درشانءِ۔ داکان بیدس بھارت نا کوزہ ٹی جموں و کشمیر اٹی پدریسہ بگڑینگوک آ انسانی حق انا سنگین حالیت آتیا چندی ڈیہہ تا ملک آک/سیاسی پڑآک، اقوام متحدہ نا باسک ملک آک و جہانی این جی اوک چندی بیان تے جاری کرینو۔ ترجمان پیدوار کرے کہ انسانی حق اکن ہائی کمشنر بھارت نا کوزہ ٹی جموں و کشمیر اٹی انسانی حق انا ساڑی سنگین حالیت آتیا تینا گڑتی نا درشانی ءِ کرینے۔ چندی ڈیہہ تا پورو مخ تفی آن ننے دوئی چندی آپشن تا رداٹ اسیجا اعلامیہ نا سوچ سمجھ فیصلہ کننگا۔ انسانی حق وکونسل نا اینو اسکان نا دیوان اٹی داڑاہچ ءُ رائے شماری اس متنے۔ دارداٹ کروک آ ہروڑنا قیاس آرائیک غلط، بے بنداو و من گھڑت ءُ۔ انسانی حق کونسل اٹی کشمیر آ راستکی تے امنا کننگ دارداٹ پاکستان نا کوشست آتا امنائی ءِ و پاکستان اقوام متحدہ نا جنرل اسمبلی ٹی دا معاملہ ءِ پورو واک اتون ہرفک۔