بنجائی وزیر تعلیم و کسبی تربیت شفقت محمود نا پریس کانفرنس

ہائیر ایجوکیشن کمیشن یونیورسٹی تا آب ءِ ہُننگ کن ٹیسٹنگ سروس و آئی بی سی سی تعلیمی سند آتا پک کننگ کن آن لائن سروس نا بناءِ کیک
اسلام آباد۔ 24ستمبر (اے پی پی) بنجائی وزیر تعلیم و کسبی تربیت شفقت محمود پارینے کہ ہائیر ایجوکیشن کمیشن یونیورسٹی تا آب ءِ ہُننگ کن ٹیسٹنگ سروس و آئی بی سی سی تعلیمی سند آتا پک کننگ کن آن لائن سروس نا بناءِ کیک، مچ آ ملک انا تعلیمی بورڈ آتے 8می، و 12می نا امتحان آتا ہلنگ نا سفارش کننگانے۔ چارمی بین الصوبائی کانفرنس نا فورم آن پد پریس کانفرنس آن تران کرسا بنجائی وزیر پارے کہ کانفرنس اٹی بھاز انگا اسیجا فیصلہ غاک مسنو، بنجائی و صوبائی حکومت آتا فرض ءِ کہ او سپریم کورٹ نا فیصلہ غا عملدرآمد ءِ المی کیر۔ اوپارے کہ 2017ء نا فیس سٹرکچر ءِ بروک آ اِراسال اٹی پنچ درسد نا ودکی آن ودفنگ مریک ہرا سپریم کورٹ نا کانود نا خلاف ورزی ءِ کیک اودے سگنگ پننگک، فیصلہ غا عملدرآمد کرفنگ ننا زمواری ءِ۔ اوپارے کہ دینی مدرسہ غاتون ہرافیصلہ مسنے اوفتیا ہمہ عملدرآمد کننگ نا ءِ دابارواٹی غٹ چیف سیکرٹری صاحب آتے حوال تننگانے۔ اوپارے کہ تعلیمی سال اٹی ہم یکسانیت بایدے مرے، پاکستان نا غٹ بورڈ 15اگست اسکان ایف اے و ایف ایس سی نا نتیجہ غاتا پڑو ءِ کیر، 15ستمبر آن یونیورسٹی تیٹی کلاس آتے بناکننگ آ امنا مسنے۔ اوپارے کہ ہائر ایجوکیشن کمیشن ورلڈ بینک اتون 400 ملین ڈالر نا معاہدہ کرینے۔ داڑان دوئی مروک آ پیسہ غاتے ایچ ای سی نا ڈٹ آتیا خڑچ مریک۔ اوپارے کہ پوسکن آ یونیورسٹی تا جوڑ کننگ نا جاگہ غا ساڑی آ یونیورسٹی تا نظام ءِ گچین کننگ نا گرج ءِ، یونیورسٹی تا آب ءِ گچین کننگ کن استاد آتا تربیت و ریسرچ پروگرام تیا چکار کننگک۔ اوپارے کہ مالی مشکل آتا سوب آن ایچ ای سی نا بجٹ اٹی زیات فنڈ تننگ متنے، نن کوشست کننگ اُن کہ اودے پین فنڈ فراوان کننگے۔ صوبائی حکومت آک ہم یونیورسٹی تے فنڈ فراوان کرینو۔ اوپارے کہ ملک انا غٹ یونیورسٹی تا آب اسہ وڑ اف، ایچ ای سی یونیورسٹی تا آب ءِ ہُننگ کن زوت اسہ قومی کہول نا ٹیسٹنگ سروس اسے نا بناءِ کننگ ءِ۔ اوپارے کہ انٹر بورڈ کمیٹی آف چیئرمین (آئی بی سی سی) تعلیمی سند آتا رجسٹریشن و درملکی تعلیمی سند آتا ایکویلنس کن آن لائن سروس اد درستی راستی کرفنگ ءِ ہراڑان الس ءِ آسراتی ملک۔ اوپارے کہ بین الصوبائی وزراء کانفرنس نا فورم آ تعلیمی بورڈ ز انا چندی معاملہ غاتیا شرہ مس۔ فورم دا سلہ کرے کہ تعلیمی بورڈز 8می، 10 می و 12می نا امتحان آتے ہلیک، 9 می و 11می نا امتحان آتے چٹفنگے۔