وزیراعظم عمران خان تون چین نا وزیر خارجہ وانگ ژی نا اوڑدہی

نیویارک۔ 23ستمبر (اے پی پی) وزیراعظم عمران خان تون چین نا وزیر خارجہ وانگ ژی دوشنبے نادے اوڑدہی کرینے و تنازعہ کشمیر تون اوار پاکستان نا اہم فائدہ غاتا رکھ و مون آ دننگ کن چین نا پورو مخ تفی نا عزم انا اعادہ ءِ کرینے۔ دا اوڑدہی اقوام متحدہ نا جنرل اسمبلی نا 74می دیوان نا وخت آمس۔ وزیراعظم زور شاغساپارے کہ ہڑتوم آ ملک آتا نیام اٹ آزموندہ، سدابہارو اسٹریٹجک کمکاری آ مبنی شریداری ڈیہہ و داکان پیشن امن و سوگوی کن اہم ءُ عنصر اسے۔ اوداہیت آ است جمی ظاہر کرے کہ ہڑتوم آ ملک آتا نیام اٹ تین پہ تینی تعلقداری دے پہ دے سوگوآن سوگوتر مننگ ءِ انتئے کہ دا علاقائی و جہانی معاملہ غاتیا تین پہ تینی شرف، اسیجا فائدہ غاتیا مبنی ءِ۔ اوپارے کہ پاکستان چین پاکستان اقتصادی راہداری ءِ بے کچ اہمیت ایتک ہرا پاکستان نا شونداری و شونہالی ٹی اہم کڑد ادا کرینے۔ مقبوضہ کشمیر اٹی حالیت آتے تالان کرسا وزیراعظم پارے کہ لکھ آ کشمیری محاصرہ ٹی ءُ، انسانی حق انا سنگین خلاف ورزیک برجاءُ و مقبوضہ دامان اٹی بدترین انسانی المیہ اس ودی مسنے۔ او پیدوار کرے کہ بھارت نا کنڈآن پنچ اگست آ غیر کانودی و اسہ کنڈی گام گیج نا مسخت جہانی کہول آ امنا مروک متنازعہ علاقہ مقبوضہ کشمیر نا حیثیت ءِ بدل کننگ نائس ہراکہ اقوام متحدہ نا سلامتی کونسل نا چندی قرارداد و جہانی کانود نا خلاف ورزی ءِ۔ وزیراعظم زور شاغسا پارے کہ مقبوضہ دامان اٹی کشمیری تا مشکل آتا چٹفنگ کن دمدستی وڑاٹ کرفیو ءِ ہرفنگے۔ چین نا وزیر خارجہ دا عزم انا اعادہ ءِ کرے کہ چین نا سرکڑدہ قومی فائدہ غاتا غٹ معاملہ غاتیا پاکستان نا مخ تفی ءِ برجاتخک۔ اوپرامن ڈیہہ کن چین پاکستان سدا بہار تزویراتی کمکاری آ مبنی شریداری نا اہمیت ءِ تالان کرے۔ وانگ ژی دا عزم انا اعادہ ءِ کرے کہ چین نا سرکڑدہ کمیونٹی نا اسیجا آخبت نا تعمیر و غٹ بشخ آتے ٹی کمکاری کن پاک چین تعلقداری تے پین سوگو کننگ کن پاکستان نا سرکڑدہ غاتون اواری اٹ کاریم کیک۔ اوبیلٹ اینڈ روڈ انیشی ایٹو آ سرسہب عملدرآمد آ زور شاغا و پارے کہ سی پیک پاکستان و ڈیہہ نا شونداری و معاشی سوگوی ٹی اہم کڑد ادا کیک۔ اوڑدہی ٹی کڑدہ غاک علاقائی سلامتی آ ہم گپ و تران کریرو ڈیہہ ٹی امن و سوگوی ءِ مون آ دننگ کن خڑکی رابطہ غاتے برجاتخنگ آ امنا کریر۔