اسلام آباد۔ 23 ستمبر (اے پی پی) صدر مملکت ڈاکٹر عارف علوی پارینے کہ مخلص سرکڑدہ و غٹ دوئی وسیلہ غاتا مدبرانہ کاریم اٹ اتنگ و خواری نا کمک اٹ قومی شونداری و بڑز ءُ ہند اس دوئی کننگ مریک، دا عوامل آک ہمووخت آ کارگر مریرہ ہراتم سرکاری ملازم آک ایمانداری اتون تینا لائخی تے کاریم اٹ اتسا گچین وڑاٹ تینا فرض ءِ سرانجام ایتر۔ ساڑی حکومت نا گچین گام گیج آتا سوب معیشت اٹی گچینی بسنے، بھارت نا فسطائی سرکڑدہ اقلیت آتیا بیدادی کننگ ءِ، بھارت کشمیری تا تینا جہد آجوئی ءِ دم کش کننگ کپک۔ داخیال آتا درشانی ءِ او دوشنبے نادے آ ایوان صدر اٹی ایگزیکٹو ڈویلپمنٹ انسٹی ٹیوٹ و نیشنل اسکول آف پبلک پالیسی(این ایس پی پی) نا تربیت نا 111می نیشنل مینجمنٹ کورس و سری لنکا نا سول آفسیر /بشخ ہلوک آتیان تران کرسا کرے۔ صدر مملکت پارے کہ گچین و بے کنڈ ہلوک سول سروس نظم و نسق انا فعال نظام نا مرکزی ٹک ءِ۔ سینئر سول سرونٹس نا بطور لیڈر و ریاست نا کسٹوڈین نا حیثیت اٹ کڑد خصوصی اہمیت تخک۔اوآفیسر آتیا زور شاغا کہ او تینا ذہن اٹ خلقت نا گچینی ءِ جاگہ ایتر و اوفتے ہروخت السی خذمت آتا گچینی کن بایدے کاریم کروئی مرے۔ اوپارے کہ السی ویل آتا ایسری ٹی ہرے آن احساس محرومی پدی مریک ہنداخاطران السی ویل آتا ایسری ٹی قاعدہ و ضابطہ نا گرج آک بایدے اڑاند مفس۔
