نیویارک ۔ 23 ستمبر (اے پی پی) وزیراعظم عمران خان پارینے کہ جنگ آن ویل آتا ایسری آ باور کپنہ، داڑان اگہ اسہ ویل اس ایسر مریک تو کیہی پین ویل آک ودی مریرہ، سفارتکاری نا کمک اٹ ویل آتے ایسر کننگ نا حق اٹی اُٹ، اقوام متحدہ ٹی کشمیر نا مقدمہ ءِ دیوہ ، صدر ٹرمپ اتون اوار جہانی راہشون آتون اوڑدہی ٹی مقبوضہ کشمیرآن کرفیو ءِ ہرفنگ کن کڑد ادا کننگ نا پاوہ، صدر ٹرمپ اتون اوڑدہی ٹی اوغان عملءِ دُوارہ بحال کننگ کن اوفتے قائل کننگ نا پورو کوشست کیوہ، ہندوستان اٹی ہندوبالادستی نا نظریہ مہاتما گاندھی نا نظریہ نا خون ءِ، اسلام بیرہ اسٹ ہی ءِ و او محمد عربی نا اسلام ءِ ہراٹی غٹ انسانک بریبر حق تخرہ، ہنداسوب ءِ کہ اسہ یہودی اس مدینہ نا ریاست نا سروک نا برخلاف مقدمہ کننگ کریکہ، چین وخت اس ہم پاکستان نا خارجہ یا داخلہ پالیسی ٹی نیام تمتنے ۔ اودوشنبے نادے آ فارن ریلیشن کونسل نا شرہ نا وخت آ گپ و تران کریکہ ۔ اوپارے کہ جیمز مینڈس پہہ مفک کہ پاکستان اٹی انتہاپسندی انت اکن بس;238; پاکستان روس انا برخلاف امریکہ تون اواری اٹ مزاحمت کرے، روس ہراتم اوغانستان آ جلہو گیر مس تو مچ آ دنیا غان مسلمانک روس انا برخلاف اوغانستان آ بسر جہاد کریر، ہموتم دا مجاہدین ئسر ولے اوکان پد نائن الیون نا واقعہ غان پد اوفتے دہشت گرد گوندنگا، دہشت گردی نا برخلاف جنگ اٹی 70 ہزار پاکستانی تینے ندر کریر، اوغانستان آن روس انا پیش تمنگ آن پد امریکہ پاکستان ءِ تنیا اِلا ۔ نائن الیون آن پد ولدا امریکہ ءِ پاکستان نا ضرورت تما، ہرابندغ آتے روس انا برخلاف جہاد نا تربیت تننگا ہموفتے نائن الیون اٹی دہشت گرد گوندنگا، دہشت گردی نا برخلاف جنگ اٹ پاکستان ءِ 200 ارب ڈالر نا نسخان مس ۔ پاکستان اٹی مذہبی انتہاپسندی نا ماسک روس انا برخلاف مزاحمت نا زمانہ نا ءُ ۔ مسکوہی صدر جنرل پرویز مشرف آ اِراوار جلہو کننگا ۔ اسہ سوج اسے نا ورندی ٹی اوپارے کہ ای اسٹ انگا بندغ اُٹ ہرانا مدام موقف مسنے کہ اوغانستان نا ویل انا فوجی ایسری ممکن اف ۔ اوپارے کہ ای اوغان تاریخ آن بلد اُٹ، اوغانستان اٹی وخت اس ہم بیرونی طاقت کوزہ کننگ کتنے، صدر ٹرمپ ءِ ہم ہنداپارین کہ اوغانستان نا فوجی ایسری ممکن اف، پاکستان اٹی داوخت آ ہم 27 لکھ آن زیات اوغان باہوٹ رہینگ انگ ءُ ، پاک اوغان سیم آ اولیکو وار باڑخلنگ انگ ءِ، پاکستان اوغان باہوٹ آتا سوب آن تینا سیم ءِ پورو بند کننگ کپک، اوغانستان اٹی صدر ٹرمپ انا کوشست آتیان امن معاہدہ غا دستخط مننگ والا ئس ، بدبختی اٹ اوغانستان اٹی امن معاہدہ آخیری وخت آتے ٹی طے مننگ کتو، اوغانستان اٹی پائیدار امن سیاسی مذاکرات اٹ ہی مننگ کیک، اوغانستان اٹی سیاسی مذاکرات نا سرسہبی بھاز مشکل ءُ مرحلہ سے ، کنا خیال اٹی طالبانک مچ آ اوغانستان آ کنٹرول کننگ کپسہ، اوغانستان اٹی ہردے بمب دھماکہ غاتے ٹی بے گناہ جانک زیان مننگ ءُ ، ہر ذی شعور بندغ اوغانستان اٹی امن نا خواہندار ءِ ۔
