نیویارک ۔ 23ستمبر (اے پی پی) وزیر خارجہ شاہ محمود قریشی پارینے کہ کشمیری ڈل مقبوضہ کشمیر نا تازہ انگا حالیت آتیان معلومدار کرینے، بھارت مقبوضہ کشمیر نا حالیت آتا بابت دنیا تون دروغ تڑنگ ءِ، وزیراعظم عمران خان اقوام متحدہ نا جنرل اسمبلی نا دیوان اٹی کشمیر نا سفیر نا حیثیت اٹ مچ آ دنیا ءِ بھارت نا اصل دروشم ءِ نشان ایتک، اومیت ءِ کہ زوت اقوام متحدہ نا مبصر مقبوضہ دامان اٹی گدریفنگک، کشمیر نا ویل غٹ آن اول و غٹ آن افضل ءِ ۔ کشمیری راہشون غلام نبی فائی و ڈل انا ایلو باسک آتون اوار میڈیا تون گپ و تران کرسا شاہ محمود قریشی پارے کہ مقبوضہ کشمیر داوخت دنیا نا غٹ آن بھلا جیل اٹ بدل مسنے، ہسپتال ، اسکول و مواصلاتی ذریعہ غاک بند ءُ، بھارت روڈ آتیا خورک اسکول بس آتا عکس آتے جوڑ کرسا دروغ انا پروپیگنڈہ کننگ ءِ ولے دنیا بھارت نا اصلیت ءِ چاہسونے ۔ اوپارے کہ کشمیری ورناک آجوئی نا جہد کن پرعزم ءُ ۔ بھارت مقبوضہ کشمیر اٹی پنچائیت کرسا بی جے پی نا سیل اس جوڑ کرینے تانکہ اکثریت ءِ اقلیت اٹ بدل کننگ نا کوشست کننگ مرے ۔ اوپارے کہ کشمیری ڈل ہموجاگہ نا تازہ انگا حالیت آتیان معلومدار کرینو تانکہ اقوام متحدہ نا جنرل اسمبلی آن تران اٹی وزیراعظم عمران خان دنیا ءِ دا حالیت آتیان معلومدار کننگ کے ۔ اوپارے کہ مودی تینا مون انگا مون ءِ نشان تننگ کپک ، اینو دیکی میڈیا، انسانی حق انا ادارہ غاک و یورپی یونین اودے بے نقاب کننگ ءُ ۔ اوپارے کہ مودی سمجھک کہ ہوسٹن اٹی اسہ جلسہ اس کرسا او دنیا ءِ گمراہ کیک ولے ہندا میدان اٹ ہزار آخلقت نریندر مودی نا گام گیج و کوزہ گر فوج انا ظلم انا برخلاف نعرہ بازی کرینو و پرامن برانز کننگ نا کمک اٹ نریندر مودی نا برخلاف گو مودی گوانا نعرہ خلکونو ۔ اومیت ءِ کہ دا توار ءِ ہم دنیا بنک ۔ اوپارے کہ بھارت مقبوضہ کشمیر اٹی خلیس نا چاگڑد اس ودی کرینے و و ہچ کس ءِ اوڑے ہلنگ پننگ ءِ ۔ اسہ سوج اسے نا ورندی ٹی وزیر خارجہ پارے کہ بھارتی مندوب اگہ پاکستان نا موقف ءِ پروپیگنڈہ سمجھرہ تا کار اودے غلط گوندر و انسانی حق آتا ادارہ، اقوام متحدہ نا مبصر آک و جہانی میڈیا ءِ مقبوضہ کشمیر آ ہِننگ کن موکل ایتر تانکہ او تینٹ خنر کہ دِنا موقف درست و دِنا غلط ءِ ۔ اسہ پین سوج اسے نا ورندی ٹی وزیر خارجہ پارے کہ امریکی صدر ڈونلڈ ٹرمپ ثالثی نا پیش کش کرے ہراڑا اونا منت وار اُن ولے اونا پیش کش ءِ نن آخا بلکن بھارت منتنے، و دانا سوب دادے کہ او تینا مکروہ دروشم ءِ دنیا غان اودیم کننگ خواہک ۔ اسہ سوج اسے نا ورندی ٹی وزیر خارجہ پارے کہ بھارت داوخت بدترین بیدادی نا چرجوئی ءِ برجاتخانے ، کشمیری سرکڑدہ غاتے تو اِلے مقبوضہ وادی نا محلہ نا کہول انا کارندہ غاتے ہم دزگیر کرسا جیل تیٹی بٹنگانے و جیل تیٹی گنجائش ختم مسنے ۔ اوپارے کہ وزیراعظم نا جہانی ریڈ کراس نا نمائندہ غاتون اوڑدہی مسنے و نن اوفتیان ہریفینن کہ انت مقبوضہ دامان نما مینڈیٹ اٹی اوار اف تو اوفتا دا پاننگ ئس کہ دا ننا مینڈیٹ ءِ و دا مینڈیٹ منسوخ متنے ولے ننے رسینگ تفننگ انگ ءِ ، نن اوفتے پارینن نما مینڈیٹ سیاسی آخابلکن انسانیت نا مینڈیٹ ءِ داڑاکاریم کرسا مقبوضہ کشمیر آہِننگ کن بھارت تون ہیت کیر ۔ اوپارے کہ ہر پاکستانی نا فرض ءِ کہ اوکشمیری تا توار جوڑ مرے و نن مرینہ ۔ کشمیری راہشون غلامی نبی فائی ہم داوخت آ گپ و تران کرسا وزیراعظم عمران خان نا منت واری ءِ ہرفے ہرامظفر آباد اٹی کشمیر نا سفیر مرسا کشمیر نا ویل ءِ تالان کننگ نا بیڑہ ءِ ہرفے ۔ اوپارے کہ دا پڑو آن کشمیری تا حوصلہ بڑز مسنے ۔ اوپارے کہ وزیراعظم عمران خان نئے بیرہ کشمیری تا مشکل آتیان معلومدار ءِ بلکن او ہر کہول آ بھارتی بیدادی ءِ پاش کننگ نا عزم تخک ہراڑا نن وزیراعظم عمران خان و وزیر خارجہ شاہ محمود قریشی نا منت وار اُن ۔ اوپارے کہ اومیت ءِ کہ پاکستان کشمیری تا گچین سفارت کاری ءِ کیک و اقوام عالم ءِ جنرل اسمبلی نا دیوان اٹی کشمیر نا اصل دروشم ءِ نشان ایتک ۔ اوپارے کہ بھارت مقبوضہ کشمیر اٹی آر ایس ایس نا ہیل تروک خلقت ءِ مون تسنے و چم بازی تا کمک اٹ کشمیری تا توار ءِ توننگ نا کوشست کننگ ءِ ۔ اوپارے کہ لاک ڈاءون و کرفیو نا سوب آن کشمیری تا مشکل آک پین ودانو ۔ ہسپتال ، اسکول آک بند ءُ ہروڑنا رابطہ ءِ بند کننگانے ۔ داوخت آ اقوام متحدہ ٹی پاکستان نا آخبتی مندوب ڈاکٹر ملیحہ لودھی ہم ساڑی ئس ۔ داکان بیدس وزیراعظم آفس نا میڈیا ونگ آن جاری پریس ریلیز نا رداٹ ڈل اٹی ڈاکٹر غلام نبی فائی، ڈاکٹر غلام میر، ڈاکٹر خالد قاضی، امتیاز خان، عبدالرءوف میر، سردار سرور خان و ایلوفک اوار ئسر ۔ ڈل جہانی فورم تیا گچین وڑاٹ کشمیر نا ویل ءِ تالان کننگ آ وزیراعظم نا منت واری ءِ ہرفے ۔ ڈل اٹی بھارتی مقبوضہ کشمیر اٹی دزگیر ہمو کشمیری تا خڑک انا سیال و قریب آک ہم اوار ئسر ہرافتے تون غٹ رابطہ غاک بند مسنو ۔ وزیراعظم عمران خان ڈل ءِ باوری کرفے کہ او مچ آ دنیا ٹی کشمیری تا سفیر نا حیثیت اٹ غٹ جہانی فورم تیا مظلوم کشمیری تا توار ءِ بڑز کرسا کیک ۔
