اسلام آباد ۔ 23 ستمبر: مزن وزیر عمران خان ءِ ھاسیں کمکار برائے اھوالکاری ءُُ شنگ کاری ڈاکٹر فردوس عاشق اعوان ءَ گوشت کہ پاکستان ءُُ چین دراج بُریں سٹریٹجک شریکدار انت، دوئیں ملک یکجائیں معاشی وشھالی ءُُ ایمنی ءِ واستہ یکجائی ءَ کار کنگ ءَ انت ۔ اے ھیالانی درشانی آئی ءَ دو شمبے ءَ پاکستان نیشنل کونسل آف دی آرٹس (پی این سی اے) ءَ السی جمہوریہ چین ءِ برجائےی ءِ 70سالی مراگش ءِ رد ءَ یک برجم داشتگیں دیوانے ءِ تہ ءَ گشتانک ءِ ساھت ءَ کت انت ۔ آئی ءَ گوشت کہ چین ءِ کشاں چیل کشمیر ءَ ھوار ارزشتی ایں جیڈھ آنی سر ءَ پاکستان ءِ کمک انت ءُُ بھارت ءِ نیمگ ءَ چہ مقبوضہ کشمیر ءِ ھاسیں بستار ھلاس کنگ ءَ چہ پد ھم چین ءِ اے کمک جاڑی انت ۔ چین سٹریٹجک شریکدار ءِ رنگ ءَ ارزشتی ایں کار آنی رد ءَ مدام پاکستان ءِ گوما ھمگام ءَ اوشت ایت ۔ آئی ءَ گوشت کہ گوستگیں سال ءَ چین ءَ پاکستان ءِ معاشی چیلنجز ءَ گوں گر ءُُ دار ءِ واستہ کمک داتگ، پاکستان یک چین ءِ پالیشی ءِ کمک ءَ کنگ ءُُ تائیوان، ہانگ کانگ ءُُ بحیرہ زرّباری چین ءِ جیڈھ آنی سر ءَ چین ءِ کمک ءَ کنت انت ۔ آئی ءَ گوشت کہ چین ءَ دمگی دوستی ءُُ میاں اوستمانی کمکار ءِ بستار ءَ ھمک سکیں ساھت ءَ پاکستان ءِ گوما ھمبراھ داری کتگ ۔ چین معاشی ، چاگردی ، دیمپانی ءُُ دود ءُُ ربیدگی کار آنی تہ ءَ پاکستان ءِ سٹریٹجک شریکدار انت ۔ آئی ءَ محمد مصطفی ﷺ ءِ فرمان ءِ ھوالگ ءَ دیان ءَ گوشت کہ ’’زانشت ءِ ھیل کنگ واستہ ترا چین ءَ روگ کپ ایت گڈا برو‘‘ آئی ءَ گوشت کہ چین زانشت، جان سلامتی، معیشت، ٹیکنالوجی ءُُ گریبی ءِ ھلاسی ءِ شوبگ ءَ دگنیا ءِ سروکی ءَ کنگ ءَ انت ۔ اے موہ ءِ سر ءَ وزیر ءِ مملکت برائے پارلیمانی کار علی محمد خان ءَ گشتانک دیان ءَ گوشت کہ دوئیں ملک آنی نیام ءَ کوھنیں زمانگ ءَ گوں سیادی است، وھد ءِ چینی تاجر ریشم ءِ دگ ءَ چہ تجارت ءِ واستہ پاکستان ءَ اتکگ انت ۔
