اسلام آباد۔ 23ستمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ مودی حکومت مقبوضہ کشمیر اٹی انسانیت نا تضحیک ءِ کرسا ڈیہہ نا امن و سوگوی ءِ گہیو تخنگ ءِ، وزیراعظم نا دورہ امریکہ ٹی کشمیر نا ویل سرفہرست ءِ، عمران خان سفارتی پڑاٹ بھارتی وزیراعظم نا اصل دروشم ءِ پاش کننگ ءِ، مقبوضہ دامان اٹی بھارتی بیدادی آ ہر خن خڑینکی ءِ۔ او دوشنبے نادے آ ہندی ہوٹل اٹی ”کشمیر نا مصائب، ڈیہہ ٹی چٹپروک آ انسانی تنکی، نا سرحال آ کانفرنس آن تران کریکہ۔ کانفرنس آن پارلیمانی کشمیر کمیٹی نا چیئرمین سید فخر امام، حریت راہشون نا اُرائی مشعال ملک تون اوار ایلو فک ہم تران کریر۔ وزیراعظم نا خصوصی کمکارحوالکاری و شینکاری فردوس عاشق اعوان دود آن تران کرسا پارے کہ جنرل اسمبلی نا دیوان مچ آ دنیاغان بروک انسانی حق آتا تنظیم تا ہم امتحان ءِ، مودی ڈیہہ نا امن ءِ چیلنج کرینے، میڈیا کشمیر ی تا توار ءِ دنیا اسکان سرکننگ کن کڑد ادا کننگ ءِ، پاکستان و کشمیر نا اسہ جون و اسہ روح انا رشتہ ءِ۔ کشمیر پاکستان نا دفاعی حصار ءِ، جنگ اکن جوش اتون اوار اوار ہوش انا ہم گرج مریک۔ اوپارے کہ جہانی کہول آ بھاز انگا چیلنج آک مون تروک ءُ، نن بایدے یکجا مرین، سیاسی پوائنٹ سکورنگ و جندی فائدہ غاتے پد پشت تخوئی مریک، داوخت آ ایجنڈا بیرہ کشمیر انا مرے، گڑاس خلقت مارچ انا ہیت ءِ کننگ ءُ، او خلقت تینا مارچ ءِ کشمیر مارچ انا پن ایتر، ہرجاگہ غا اپوزیشن ءِ اوار دننگ کن تیار اُن، کشمیر نا ویل آ پاکستان تینا کڑد ءِ ادا کرسا کیک۔ اوجہانی برادری آ زور شاغا کہ او مون آ برے و کشمیر نا ویل انا بابت اقوام متحدہ نا سلامتی کونسل نا قرارداد آتیا عملدرآمد کن تینا کڑد ءِ ادا کے۔ اوپارے کہ فسطائی، نسل پرست و انتہاپسند بھارتی کماشی ءِ اقوام متحدہ نا منشور و جہانی کانود نا پابند کننگے۔ اوپارے کہ وزیراعظم عمران خان امریکہ ٹی جہانی راہشون آتون اوڑدہی تیٹی مودی حکومت نا بدنما و مون انگا دروشم پاش کننگ ءِ، مظلوم کشمیری تا توار ءِ گچین وڑاٹ بڑز کننگ کن سیوت نا گرج آ زور شاغا۔ اوپارے کہ حکومت بیرونی محاذ آ مون تروک چیلنج آتون مون تننگ کن حزب اختلاف ءِ تین تون اوار دننگ کن تیار ءِ۔ اوپارے کہ میڈیا کشمیری تا توار ءِ دنیا اسکان سرکننگ اٹ اہم کڑد ادا کننگ ءِ، سوشل میڈیا نا کمک اٹ کشمیر نا ویل ءِ گچین وڑاٹ تالان کننگ مریک، کشمیر نا بابت بھارت نا مکروہ دروشم بے نقاب کننگ کن ڈاکومینٹری بایدے جوڑ کننگے تانکہ دنیا بھارت نا اصل چہرہ ءِ تینا خن تے اٹ خننگ کے۔
