ہموجاگہ نا حالیت آتا جاچ ءِ ہلسا تینا رپورٹ ءِ جہانی برادری و اقوام متحدہ غا پیش کینہ، اگہ بھارتی حکومت رسینگ تفننگ ءِ تو تینا مشکل و گڑتی تا بارواٹ جہانی برادری ءِ معلومدار کننگے، وزیر خارجہ شاہ محمود قریشی

نیویارک۔ 23 ستمبر (اے پی پی) وزیر خارجہ شاہ محمود قریشی انسانی حق انا جہانی تنظیم تیا زور شاغانے کہ او مقبوضہ کشمیر اٹی محاصرہ ٹی بند خلقت اسکان سرمننگ کن رسینگ دوئی کیر و ہموجاگہ نا حالیت آتا جاچ ءِ ہلسا تینا رپورٹ ءِ جہانی برادری و اقوام متحدہ ءِ پیش کینہ۔ اگہ بھارتی حکومت رسینگ تفننگ ءِ تو تینا مشکل و گڑتی تا بارواٹ جہانی برادری ءِ معلومدار کیر۔ داخیال آتا درشانی ءِ او وزیراعظم عمران خان تون ایمنسٹی انٹرنیشنل، ریڈکراس و ایلو ڈل آتا اوڑدہی تیان پد پریس کانفرنس آن تران کرسا کرے۔ شاہ محمود قریشی پارے کہ مقبوضہ دامان اٹی مظلوم کشمیری تسکان دوائی و غذائی گڑاتے سرمننگ کن ہلنگ پننگ انگ ءِ، اوفتیان موبائل فون و انٹرنیٹ نا سہولت ءِ ہم پلنگانے ہرانا سوب آن اوفتا دنیا تون رابطہ بند ءِ۔ انسانی حق انا تنظیمک مقبوضہ کشمیر اٹی دمدستی وعڑاٹ ریلیف نا سرجزآتا بناءِ کیر انتئے کہ ہموڑے لاک ڈاؤن نا سوب آن انسانی المیہ اس ودی مسنے۔ اوپارے کہ آئی سی آر سی المی وڑاٹ تینا مینڈیٹ ءِ کاریم اٹ بایدے اتے۔