وزیراعظم نا خصوصی کمکار نیشنل ہیلتھ سروسز ریگولیشنز اینڈ کوآرڈینیشن ڈاکٹر ظفر مرزا نا پریس کانفرنس

اسلام آباد۔ 22 ستمبر (اے پی پی) وزیراعظم نا خصوصی کمکار نیشنل ہیلتھ سروسز ریگولیشنز اینڈ کوآرڈینیشن ڈاکٹر ظفر مرزا پارینے کہ بروک آ سال ملک اٹی ڈینگی نا بابت صوبہ غاتون اواری اٹ مربوط پروگرام جوڑ کینہ تانکہ دا مرض ءِ چٹفنگ مرے، مچ آ ملک آن 10 ہزار 13مریض آتے ٹی ڈینگی نا تشخیص مسنے، حکومت ڈینگی وائرس ءِ کنٹرول کننگ کن پبی گام گیج کننگ ءِ، بنجا و صوبہ غاک ڈینگی نا بابت اسہ ایلو تون رابطہ ٹی ءُ، اسلام آباد نا ہسپتال آتے ٹی مریض آتا کچ بھاز زیات مسنے، پرائیویٹ سیکٹر ہم ننے ڈینگی نا مریض آتے کن آسراتی فراوان کننگ نا باوری کرفینے، پرائیویٹ ہسپتال آک اسہ ہزار کٹ مفت فراوان کننگ نا پارینو، اسلام آباد نا خلقی علاقہ غاتے ٹی بی ایچ یوز ءِ آپریشنل کرینن، ننے اواری اٹ ڈینگی ءِ چٹفوئی مریک، پشہ غاتے خلنگ کن اسپرے ہم کننگ انگ ءِ، اومیت ءِ کہ 10 دے آن پد ڈینگی نا مریض آتا کچ اٹی نمان کمتی مریک۔ داخیال آتا درشانی ءِ او یک شنبے نادے آ پریس انفارمیشن ڈیپارٹمنٹ(پی آئی ڈی) ٹی پریس کانفرنس آن تران کرسا کرے۔ داوخت آ سیکرٹری جان جوڑی ڈاکٹر اللہ بخش ملک ہم ساڑی ئس۔ خصوصی کمکار پارے کہ تدوک آ 48 گھنٹہ ٹی مچ آ ملک اٹی ڈینگی نا مریض آتا کچ اٹی ودکی مس، ہسپتال آتے ٹی ڈینگی نا مریض آتا کچ ودانے، ڈینگی نا بابت مچ آ ملک اٹی گڑتی ءِ، داوخت انا حساب وکتاب نا رداٹ مچ آ ملک اٹی 10 ہزار 13مریض آتے ٹی ڈینگی نا تشخیص مسنے، دادے اسہ رداٹ ہُننگ و سنجیدہ ہلنگ نا گرج ءِ داکان مست ہم ڈینگی نا کیس آک ڈبل آن زیات ئسر ولے حکومت ڈینگی آن بچفنگ کن پبی گام گیج کننگ ءِ۔