وزیراعظم عمران خان نا کماشی ٹی بھاز زوت ملک شونداری نا کسر آ روان مریک، بنجائی وزیر داخلہ اعجاز شاہ

ننکانہ صاحب۔ 22 ستمبر (اے پی پی) بنجائی وزیر داخلہ اعجاز احمد شاہ پارینے کہ وزیراعظم عمران خان نا کماشی ٹی بھاز زوت ملک شونداری نا کسر آ روان مریک، مستین نا دور اٹی وڈی خوری و کمیشن کاٹم آن گدرینگا۔ داہیت ءِ او یک شنبے نادے آ داڑے ننکانہ صاحب اٹی مسلم لیگ ن نا راہشون و مسکوہی اومیت دار چیئرمین یونین کونسل نبی پورپیر فیصل اعجاز شاہ و اونا سد آ سنگت آتون اوار پاکستان تحریک انصاف اٹی اوارمننگ نا پڑو نا وخت آ اڈ ہلوک آ دود آن تران کرسا پارے۔ دود اٹی وزیر داخلہ تون اوار سیاسی و راجی راہشون و علاقہ والا تا بھلو کچ اس بشخ ہلکر، پیر فیصل اعجاز شاہ داوخت آ بنجائی وزیر داخلہ اعجاز احمد شاہ نا غیر مشروط مخ تفی نا پڑو ءِ کرے۔ وزیر داخلہ پارے کہ پاکستان تحریک انصاف نا حکومت ءِ بے پناہ ویل میرات اٹی ملا، وزیراعظم عمران خان ا ویل آتا ایسری کن کوشست کننگ ءِ۔ اوپارے کہ عمران خان نا کماشی ٹی بھاز زوت ملک شونداری نا کسر آ روان مریک، مستین نا دورِحکومت اٹی وڈی خوری و کمیشن کاٹم آن گدرینگا۔ وزیر داخلہ پارے کہ اونا حلقہ نا 40 آن زیات خلق اٹی سوئی گیس نا فراوانی نا ڈٹ آتیا کاریم ترندی اٹ برجاءِ، مچ آ ضلع ٹی کروڑ آ روپئی نا خڑچ آن چندی ڈٹ آتیا کاریم مننگ ءِ۔ اوپارے کہ انشاء اللہ مچ آ ملک آنبار ننکانہ صاحب اٹی ہم الس ءِ بدلی نظر بریک۔