بھارت ءِ کشمیر آ غیر کانودی کوزہ ءِ ہلوئی تمک، علی امین خان گنڈاپور

اسلام آباد۔ 22ستمبر (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ غاضب بھارت ءِ کشمیر آ غیر کانودی کوزہ ءِ ہلوئی تمک، ہوسٹن اٹی سفاک مودی نا برخلاف بھلو برانزی مچی اس کننگ ءُ، و ہندو فاشٹ ایجنڈا نا ہر کہول آ مقابلہ ءِ کننگک، داخیال آتا درشانی ءِ او امریکہ نا شار ہوسٹن اٹی انٹرنیشنل ہیومینٹرین فاؤنڈیشن نا کنڈآن دود آن تران کرسا کرے، دود اٹی پاکستانی کشمیری و ہندی کمیوینٹی بھلو کچ اسے ٹی بشخ ہلکر۔ اوپارے کہ پاکستان تون اوار دنیا نا غٹ ملک آتے ٹی مودی حکومت نا فاشٹ نظریہ نا برخلاف مچ آ دنیا ٹی برانزی مچی مننگ ءِ پاکستان نا حکومت نا سرسہب سفارت کاری نا سوب اولیکو وار دنیا نا پنجا آن زیات ملک آک کشمیر نا ویل آ پاکستانی موقف نا تائیدءِ کننگ ءُ و چندی یورپی و امریکن پارلیمنٹ اٹی ہم مقبوضہ کشمیر آ ہندو انتہاپسندی آ ہیت مننگ ءِ۔ علی امین خان گنڈاپور پارے کہ مودی ہرانگ کے کائے اونارندءِ الیپنہ، اودے مقبوضہ کشمیر آ کوزہ ءِ ہرحال ہلوئی تمک۔ اوپارے کہ اخہ بندغ مودی نا جلسہ ٹی مریرہ اوڑان دوگنی کچ اٹی خلقت اونا انتہاپسند رویہ و فاشٹ ازم انا برخلاف مچی کیرہ۔ اوپارے کہ وزیراعظم پاکستان عمران خان اقوام متحدہ نا جنرل اسمبلی ٹی تینا تاریخی تران کیک و اقوام عالم ءِ مقبوضہ کشمیر آ بھارتی بیدادی و انسانیت سوز گام گیج آتیان معلومدار کینہ، و کوشست کینہ کہ دنیا بھارت ءِ داہیت آ بیوس کے کہ او مقبوضہ کشمیر آن تینا غاصبانہ کوزہ ءِ دمدستی وڑاٹ چٹفے و اقوام متحدہ نا قرارداد آتا رداٹ مقبوضہ کشمیر نا خلقت ءِ حق خودارادیت نا حق ایتے۔