کینیڈا ٹی پاکستان نا ہائی کمشنر رضا بشیر تارڑ نا دود آن تران

ٹورانٹو۔ 22ستمبر (اے پی پی) کینیڈ اٹی پاکستان نا ہائی کمشنر رضا بشیر تارڑ پارینے کہ کشمیر نا ویل انا ایسری اسکان سویلی ایشیا ٹی امن مننگ کپک، پاکستان نا مارکیٹ کینیڈا نا کمپنی تیکن واپار، زرکاری و کاروبار کن ملوکءُ۔ اوداہیت ءِ تدوک آ دے آرگنائزیشن آف پاکستانی انٹر پرینیور قطبی امریکہ نا کنڈآن اڈ ہلوک آ دود آن تران کرسا پارے۔ ہائی کمشنر پاکستان و کینیڈا نا نیام اٹ ہڑتوم آ کنڈآتا واپار ءِ مون آ تخسا پارے کہ پاکستان ڈیہہ ٹی اسٹ انگا ملک ءِ، ہرا پیشن نا زرکاری کن غٹ آن زیات آزادانہ پالیسی جوڑ کرینے، کینیڈا ناتیل و گیس و شمسی توانائی نا کمپنیک پاکستان اٹی زرکاری نا وارخواہی تیان فائدہ ہرفنگ کیرہ۔ اوپارے کہ پاکستان ءِ بنداوی پنجر، ایگروبزنس، جان جوڑی، سائنس، ٹیکنالوجی، اختراع و تعلیمی بشخ آتے ٹی کینیڈین کمپنی تا براہ راست زرکاری نا گرج ءِ۔ اوآرگنائزیشن آف پاکستانی انٹرپرینیور قطبی امریکہ نا کنڈآن ایونٹ نا اڈتننگ نا ستا ءِ کرے و پارے کہ داوڑنا ایونٹ آتیان ہڑتوم آ ملک آتا پوریاگر و زرکار آتے خڑت اتنگ و اسہ ایلو نا آزموندہ غاتیان فائدہ ہرفنگ نا موقع فراوان کننگ ءِ۔ ہائی کمشنر ساڑی مروک آتے پارے کہ پاکستان و کینیڈ انا نیام اٹ تعلقداریک مون آ دننگ انگ ءُ و نجی بشخ انا کمکاری آن ٹیکسٹائل، لیدر، اسپورٹس، کیمیکلز، کارپٹ و ایلو بشخ آتا بابت گڑاتا برآمد آتے ٹی نمان ودکی کننگ مریک۔ اوپارے کہ کینیڈا ٹی رہینگوک آ پاکستانی کمیونٹی داجاگہ نا شونداری و شونہالی و ہڑتوم آ ملک آتا نیام اٹ تعلقداری تے مون آ دننگ کن کلیدی کڑد ادا کننگ ءُ، کینیڈ اٹی پاکستانی ہائی کمیشن و قونصل خانہ پاکستانی شاری تے ہروڑنا آسراتی تا فراوانی ٹی پرعزم ءِ۔