بنجائی وزیر داخلہ اعجاز احمد شاہ نا ننکانہ صاحب شار اٹی شونداری ڈٹ آتا جاچ دیوان آن تران

باباگرونانک نا 550می ودی دے انا دود آتا مثالی بست و بند کن غٹ وسیلہ غاتے کاریم اٹ اتنگک، وزیراعظم عمران خان بھاز زوت ننکانہ صاحب اٹی بابا گورونانک یونیورسٹی نا بنداو ءِ تخک
اسلام آباد۔ 21ستمبر (اے پی پی) بنجائی وزیر داخلہ اعجاز احمد شاہ پارینے کہ شونداری ڈٹ آتا وخت آ پوروی و شفافیت ءِ ہر حال اٹ المی کننگک، باباگرونانک نا 550می ودی دے انا دود آتا مثالی بست و بند اکن غٹ وسیلہ غاتے کاریم اٹ اتنگک، مستین نا دور حکومت آتے ٹی مروک آ وڈی خوری نا بھرم ءِ مچ آ قوم کُننگ ءِ، جہانی اہمیت تخوک ننکانہ صاحب شار انا زیبائی کن پبی گام گیج کننگک، وزیراعظم عمران خان بھاز زوت ننکانہ صاحب اٹی بابا گورونانک یونیورسٹی نا بنداو ءِ تخک، ملک اٹی کانود نا بالادستی کن ہروڑ گام گیج کننگک۔ داڑے ملوک آ پریس ریلیز نا رداٹ او ڈپٹی کمشنر آفس کمیٹی روم ننکانہ صاحب اٹی بابا گورونانک نا 550 می ودی دے انا دود آتا بست و بند و ننکانہ صاحب شار اٹی جاری شونداری ڈٹ آتا جاچ ءِ ہلنگ کن اڈ ہلوک آ دیوان آن تران کریکہ۔ اوپارے کہ پاکستان اٹی غٹ مذہب آتا منوک آتے پورو و مثالی آجوئی دوئی ءِ، حکومت اقلیتی برادری نا رکھ اکن پبی گام گیج کننگ ءِ، اوپارے کہ بابا گرونانک ءِ غٹ مذہب آتے ٹی قدر انا نظر اٹ ہُننگک ہنداخاطران اونا 550 می ودی دے ءِ شایان شان وڑاٹ اڈتننگک و وزیراعظم نا پارت آ مچ آ دنیاغان بروک آ سکھ یاتری تیکن گچین بست و بند کننگک اوپارے کہ مسکوہی دور حکومت آتے ٹی شونداری ڈٹ آتے ٹی وڈی خوری کننگا ہرانا سوب آن اینو ملک ویل آتا گواچی ءِ، ملک داوخت آ نازرک حالیت آتیان گدرینگ انگ ءِ، ملک ءِ تنکی تیان کشنگ کن ہر اسٹ ءِ تیناتینا کڑد ءِ ادا کروئی مریک دیوان اٹی ڈپٹی کمشنر راجامنصور احمد بنجائی وزیر داخلہ ءِ بابا گورونانک نا 550 می ودی دے دود و شار اٹی جاری شونداری ڈٹ آتا بارواٹ حوال تس۔ بنجائی وزیر غٹ شونداری ڈٹ آتے باباگورونانک نا نومبر اٹی مروک آ ودی دے دود آتیان مست پورو کننگ و اوفتے ٹی شفافیت ءِ المی کننگ نا پارت کرے، بنجائی وزیر داخلہ اعجاز احمد شاہ غلہ منڈی ءِ شار آن پیشن گدریفنگ و شونداری ڈٹ آتے ٹی شفافیت ءِ المی کننگ کن کمیٹی اس جوڑ کننگ نا پڑو ءِ کرے۔