صدر مملکت ڈاکٹر عارف علوی نا بھوربن اٹی ہفت می انٹرنیشنل آرتھو ڈونٹک کانفرنس آن تران

بھوربن۔ 21 ستمبر (اے پی پی) صدر مملکت ڈاکٹر عارف علوی ڈاکٹر آتیا زور شاغانے کہ او تینا مریض آتون شفقت و ہمدردی اٹ سلوک و درمان نا حیثیت اٹ درمان تون ناجوڑی تا توننگ و جان جوڑی نا نگہداشت آ زیات چکار کیر۔ داخیال آتا درشانی ءِ او تدوک آ دے بھوربن اٹی ہفت می انٹرنیشنل آرتھو ڈونٹک کانفرنس آن تران کرسا کرے۔ کانفرنس نا بست و بند ءِ پاکستان ایسوسی ایشن آف آرتھو ڈونٹسٹس (پی اے او) کریسس ہراٹی پیشن نا ملک آک و مچ آ ملک آن آرتھو ڈونٹسٹس آک بشخ ہلکر۔ کانفرنس اٹی بشخ ہلوک آک دا بشخ خاص کر مصنوعی ذہانت اٹی پوسکن آ رجحان و وڑوڈول آتیا چکار کریر۔ صدر مملکت پارے کہ درمان ناجوڑی تا توننگ و احتیاطی تدابیر آن نسبتاََ زیات کبین مریک، دامسخت ءِ السی آگاہی و اسٹیک ہولڈر آتون اواری اٹ دوئی کننگ مریک۔ صدر مملکت ہرا ایسوسی ایشن نا بانی صدر ہم مسنے، کانفرنس نا بشخ ہلوک آتے پارے کہ مصنوعی ذہانت تشخیصی لائخی تیٹی ودکی کرینے ہراڑان ڈاکٹر آتا درمان نا وڑاٹ کڑد انا اہمیت ہم ودانے۔ داکان بیدس دنان سازی نا تعلیم نا آب ہم گچین مسنے۔ جان جوڑی ٹی دنان ساز انا کڑد ءِ تالان کرسا صدر مملکت ڈاکٹر آتیا زور شاغا کہ او خلقت ءِ ناجوڑی تیان بچفنگ کن الس اٹی آگاہی تالان کیر۔دنان سازی ٹی تینا آزموندہ غاتے یات کرسا صدر مملکت پارے کہ او 80 نا دہائی آن اسہ آجو ڈینٹل کونسل نا جوڑ کننگ و السی شعورکن متاماری کننگ ءِ۔ اوپارے کہ خلقت اٹ شعور بیدار کننگ آن نئے بیرہ دنان ساز آتااست جم مریک بلکن بروک آ چین تیٹی مثبت و السی خذمت نا عادت ودی مریک۔ صدر مملکت یات دہانی کرفسا پارے کہ او ڈینٹل کالج نا جوڑ کننگ نا لیسن دوئی کروک آ اولیکو بندغ ئس۔ اوغٹ گریجویٹس آتیا زور شاغا کہ او تینا تعلیم و کسب آ زیات چکار کیر تانکہ او پوسکن آ چیلنج آتون مون تننگ کیر۔ داکان مست پی اے او نا صدر، صدر مملکت عارف علوی ءِ شیلڈ اس پیش کرے۔ اوکان پد صدر مملکت ملکی و درملکی مندوبین اٹی ایوارڈز بشخ و پانٹ کرے۔ داوخت آ پاکستان ایسوسی ایشن آف آرتھو ڈونٹسٹس نا صدر پروفیسر ڈاکٹر غلام رسول کانفرنس آن تران کرسا پارے کہ او دنان سازی و تعلیم نا آب ءِ بڑز کننگ کن پرعزم ءِ۔