اسپیکر قومی اسمبلی اسد قیصر یورو ایشین ملک آتا پارلیمانی اسپیکر آتا دیوان اٹی بشخ ہلنگ کن قازقستان آ رادہ مس

اسلام آباد۔ 21 ستمبر (اے پی پی) اسپیکر قومی اسمبلی اسد قیصر یورو ایشین ملک آتا پارلیمانی اسپیکر آتا چارمیکو دیوان اٹی بشخ ہلنگ کن قازقستان آ رادہ مس، او نور سلطان (آستانہ) ٹی 23ستمبر آن 25ستمبر 2019ء ٹی مروک آ یورپی و ایشیائی ملک آتا پارلیمنٹ آتا اسپیکر آتا دیوان اٹی بشخ ہلیک، دا فورم اٹی 84یورپی و ایشیائی ملک آتا پارلیمنٹ آتا سروک آک و 16جہانی و بین الپارلیمانی تنظیم تا سروک آک ہم بشخ ہلیرہ، دیوان نا سرحال پت و شریداری ءِ۔ قومی اسمبلی سیکرٹریٹ آن ہفتہ نادے جاری بیان نا رداٹ اسپیکر قومی اسمبلی گریٹر یورو ایشیاکانفرنس اٹی مقبوضہ جموں و کشمیر و لین آف کنٹرول نا ہڑتوم آ کنڈجاری بھارتی جارحیت نا رداٹ سویلی ایشیائی ڈیہہ نا شونداری نا کسر اٹی بروک اڑاند آتے تالان، مقبوضہ وادی ٹی کشمیری الس آ کروک آ ظلم و 50 دے آن جاری کرفیو آن مقبوضہ کشمیر نا الس آ مروک آ اثر آتیان بشخ ہلوک آتے معلومدار کیک، اسپیکر بھارتی بیدادی نا برخلاف جہانی رائے ءِ آوار کننگ کن کانفرنس اٹی شریک مندوبین آتون ہم اوڑدہی کیک۔ دابڑزکو کہولی دیوان گریٹر یورو ایشیاڈائیلاگ نا سرحال نا وڑاٹ اڈتننگ انگ ءِ، دیوان نا سرحال پت و شریداری ءِ۔ دیوان نا کلیدی مسخت گریٹر یورو ایشیائی ڈیہہ نا اوار کننگ و داٹی ساڑی لائخی نا پورو ادراک تون اوار ٹرانسپورٹ و ٹرانزٹ انفراسٹرکچر نا شونداری، تین پہ تینی واپار اٹی ودکی، صنعتی و پوسکن آ کمکاری تے ودفنگ، سیاسی و معاشی حالیت آتا تقابلی جاچ اوار ءِ۔