وزیراعظم عمران خان جنرل اسمبلی آن تران اٹی کشمیری الس نا توار ءِ بڑز، اوفتا ویل آتے تالان کیک، اقوام متحدہ ٹی پاکستان نا آخبتی مندوب ملیحہ لودھی

اسلام آباد۔ 21 ستمبر (اے پی پی) اقوام متحدہ ٹی پاکستان نا آخبتی مندوب ملیحہ لودھی پارینے کہ وزیراعظم عمران خان 27 ستمبر آ جنرل اسمبلی آن تران اٹی کشمیری الس نا توار ءِ بڑزکیک، داوخت آ وزیراعظم کشمیر نا حالیت آتیا چکار ءِ کرفنگ و کشمیری الس نا ویل آتے تالان کیک۔ ملیحہ لودھی ہفتہ نادے تینا اسہ بیان اسے ٹی پارے کہ وزیراعظم عمران خان 27 ستمبر (جمعہ نادے) 193باسک آتیا تالان اقوام متحدہ نا جنرل اسمبلی ٹی تینا تران اٹی کشمیر آن بیدس اہم علاقائی و جہانی معاملہ غاتا بابت پاکستان نا موقف ءِ پید وارکیک، داکان بیدس وزیراعظم امریکی صدر ڈونلڈ ٹرمپ اتون اوار ایلو جہانی سروک آتون اوڑدہی ہم کیک۔ اوپارے کہ اقوام متحدہ نا سیکرٹری جنرل پاریسس کہ او جنرل اسمبلی نا دیوان اٹی بشخ ہلوک آ چندی جہانی راہشون آتون کشمیر نا ویل آ شرہ کیک و یخین ءِ کہ او دا موقع ءِ کاریم اٹ اتسا جنرل اسمبلی ٹی کشمیر نا ویل ءِ ہرفک۔ ملیحہ لودھی وزیراعظم نا دورہ نا سرجم آتے پارسا پارے کہ عمران خان داوخت آ نفرت انگیز بیانیہ نا برخلاف پاک ترک کانفرنس نا میزبانی وخت اس کہ چاگڑدی رکھ انا بارواٹ پاک ملائیشیا کانفرنس آن تران ہم کیک۔ اقوام متحدہ نا جنرل اسمبلی نا دیوان کن سیکورٹی نا سخت بست و بند کننگانے و یو این کمپلیکس نا دامون ایمون اڑاند کننگانے و سروک مملکت آتا سیکورٹی کن کارندہ غاتا تعیناتی ٹی ودکی کننگانے۔