وزیراعظم نا خصوصی کمکار جان جوڑی ڈاکٹر ظفر مرزا نا راولپنڈی و اسلام آباد اٹی ڈینگی وائرس نا تالان مننگ نا رداٹ سرکاری و نجی ہسپتال آتے جان جوڑی آسراتی پروگرام نا پینل اٹ اوار کننگ نا پڑو

اسلام آباد۔ 21ستمبر (اے پی پی) وزیراعظم نا خصوصی کمکار جان جوڑی ڈاکٹر ظفر مرزا راولپنڈی و اسلام آباد اٹی ڈینگی وائرس نا تالان مننگ نا رداٹ سرکاری و نجی بشخ انا ہسپتال آتے جان جوڑی آسراتی پروگرام اٹ اوار کننگ نا پڑو ءِ کرینے، داپڑو آن مست جاڑانگا شار تا ہسپتال آتا سروک آتے پت اٹ ہلنگا تانکہ دا گام گیج نا کمک اٹ ڈینگی وائرس نا توننگ اٹ کمک ملنگ کے۔ دارداٹ اوڑدہی تیٹی ڈاکٹر ظفر مرزا بشخ ہلوک آتے مچ آ ملک اٹی ڈینگی وائرس نا تالان مننگ نا ساڑی حالیت آتا بارواٹ معلومدار، اوپارے کہ سرکاری بشخ انا ہسپتال مہالوآن بھاریم اٹ اختہ ئسر۔ ڈینگی وائرس نا تالان مننگ آن اوفتیا پین بھاریم زیات مسنے، خصوصی کمکار داہلہلئی حالیت آتون مون تننگ و لس بندغ ءِ ریلیف تننگ کن نجی بشخ انا ہسپتال آتا حکومت تون کمک و رابطہ غاتا گرج آ زور شاغا۔ دیوان اٹی بشخ ہلوک آک ملک اٹی بنداوی جان جوڑی نا آب اٹ آسراتی تا فراوانی ءِ المی کننگ کن ہرفوک آ ساڑی حکومت نا گام گیج خاص کر نیشنل ہیلتھ سروسز نا خذمت آتا ستاءِ کریر۔ نجی ہسپتال آتا نمائندہ غاک خصوصی کمکار ءِ دا ساڑی تنکی حالیت آتے ٹی تینا پبی کمکاری نا باوری کرفیر و پاریر کہ او و اوفتا ہسپتال سرکاری بشخ انا ہسپتال آتا گنجائش آن زیات ان ڈور مریض آتے کن گنجائش فراوان کننگ اٹ پبی کمک کیرہ۔