اسلام آباد۔ 18 ستمبر (اے پی پی) وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان پارینے کہ پاکستان اقلیت آتیان بیدس پورو مفک، میڈیا مقبوضہ کشمیر نا حالیت آتے گچین وڑاٹ تالان کننگ ءِ، پاکستانی میڈیا ءِ خراج تحسین پیش کینہ ہرا 5 اگست نا واقعہ غان پد مچ آ دنیا ٹی کشمیر نا ویل ءِ تالان کرے، دنیا گلوبل ویلج اس جوڑ مسنے ہراٹی میڈیا نا کڑد بے کچ اہم ءِ، وزیراعظم عمران خان و حکومت پاکستان نا وخت آ و گچین گام گیج آتیان دنیا نا ہر اہم فورم آ کشمیر نا ویل ءِ خاصی پذیرائی دوئی مس۔ داخیال آتا درشانی ءِ او کشمیر آ قومی پارلیمانی کانفرنس آن تران کرسا کرے۔ ڈاکٹر فردوس عاشق اعوان پارے کہ او آئی سی و سیکورٹی کونسل تون اوار دنیا نا اہم فورم آتیا کشمیر نا ویل ءِ پبی وڑاٹ تالان کننگانے۔ اوپارے کہ کشمیر آن بیدس پاکستان ادھوراءِ، کشمیر نا ویل پاکستانی تیکن کامن کاز اس مسنے، ہر پاکستانی کشمیر نا ویل انا ایسری کن ہر قربانی ءِ تننگ کن تیار ءُ۔ اوپارے کہ پاکستان نا غٹ حکومت آتا کشمیر نا بابت اسہ ہی منشور اس ئس کہ پاکستان تینا اصولی موقف آ سلوک ءِ۔ اوپارے کہ پاکستان ایٹمی طاقت ءِ و ساڑی حکومت قوم ءِ مایوس کپک۔ اوپارے کہ اولیکو واردنیا پاکستان نا ہیت ءِ بِننگ ءِ و بھارت ءِ ہر جاگہ غا رسوائی تون مون تروئی تمنگ ءِ۔ اوپارے کہ اقوام عالم پاکستان نا موقف نا مخ تفی ءِ کننگ ءِ و بھارتی موقف مسترد کننگ انگ ءِ۔ اوپارے کہ اقوام متحدہ ٹی وزیراعظم عمران خان نا تقریر قوم انا جوزہ غاتا ترجمانی ءِ کیک۔ وزیراعظم ہر فورم آ پاکستان نا پارلیمنٹ نا موقف ءِ پبی وڑاٹ ہرفک۔ اوپارے کہ زوت بھارتی ظلم و بربریت شکست کنیک، داڑکن ننے غٹ ءِ کڑد اداکروئی مریک۔ اوپارے کہ نن غٹ وزیراعظم نا ترجمان و کشمیر نا توار مرینہ، قومی فائدہ غاتیا نن غٹ اسہ پنہ غاٹن۔خصوصی کمکار حوالکاری پارے کہ 5اگست آن پد آن میڈیا کشمیری تا ٹھپ آتیا مالم خلنگ اٹ تینا کڑد ءِ ادا کرے، 12سال آن پد یورپی پارلیمنٹ اٹی کشمیر نا ویل آ شرہ مس۔ وزیراعظم مظفر آباد اٹی سلیس مودی ءِ ہکل تس تو اونا اوآئی سی آ ہم اثر مس۔
