اسلام آباد۔ 18 ستمبر (اے پی پی) وزیراعلیٰ بلوچستان جام کمال پارینے کہ کشمیر کاز اتون پارلیمانی یکجہتی نا درشانی مچ آ دنیا کن کلہو اسے کہ نن غٹ کشمیر نا ویل آ یک زبان اُن، کشمیری الس نا آجوئی نا جہد اٹی جانی و مالی قربانی پیش کننگ اُن، بھارتی گام گیج آک غیر کانودی و انسانی حق آن چپ ءُ۔ چارشنبے نادے آ قومی پارلیمانی کانفرنس کشمیر آن …
کشمیر کاز اتون پارلیمانی یکجہتی نا درشان مچ آ دنیا کن کلہو اسے، نن غٹ کشمیر نا ویل آ یک زبان اُن، وزیراعلیٰ بلوچستان
گیشتریں ھال
اسلام آباد۔ 18 ستمبر (اے پی پی) وزیراعلیٰ بلوچستان جام کمال پارینے کہ کشمیر کاز اتون پارلیمانی یکجہتی نا درشانی مچ آ دنیا کن کلہو اسے کہ نن غٹ کشمیر نا ویل آ یک زبان اُن، کشمیری الس نا آجوئی نا جہد اٹی جانی و مالی قربانی پیش کننگ اُن، بھارتی گام گیج آک غیر کانودی و انسانی حق آن چپ ءُ۔ چارشنبے نادے آ قومی پارلیمانی کانفرنس کشمیر آن تران کرسا وزیراعلیٰ بلوچستان جام کمال پارے کہ کشمیری ایلم تا بھلو کچ اس کوئٹہ ٹی ہم ارے۔ بلوچستان نا الس کشمیری تے تینے آن خڑک سرپند کیرہ، 5اگست نا واقعہ غان پد صوبہ بلوچستان آن کشمیری تیکن گچین و پبی وڑاٹ توار چست کننگا و کشمیری ایلم تے کن ریلی کشنگا۔ اوپارے کہ وزیراعظم پاکستان کشمیر نا ویل ءِ پبی وڑاٹ تالان کننگ ءِ، کشمیر نا ویل پاکستان کن زند انا ویل ءِ۔ اوپارے کہ بھارت اسہ ہم ہمو عمل اسے آن پدی مفک ہرا پاکستان ءِ نزور کے۔ اوپارے کہ ننے اسہ قوم اسے نا حیثیت اٹ تینا زمواری تے ادا کروئی مریک۔ سوگو پاکستان ہی کشمیر نا ایسری پیش تمک۔ ننے اواری اٹ پاکستان ءِ سوگو آن سوگو تر کروئی ءِ۔ اوپارے کہ ہر کشمیری ناخنک پاکستان آٹو و پاکستان ہی کشمیری تے آجوئی ترفک۔ جام کمال پارینے کہ بلوچستان آن تعلق تخوک آ پارلیمنٹرین صوبہ بلوچستان نا کشمیر نا ویل انا بابت پبی نمائندگی ءِ کننگ ءُ۔ اوپارے کہ پاکستانی کمیونٹی ءِ کشمیر نا ویل ءِ تالان کننگ اٹ جہانی کہول آ کڑد ادا کروئی مرے۔ اوپارے کہ سوشل میڈیا غا کشمیر نا ویل ءِ جوان وپبی وڑاٹ تالان کرسا دنیا ءِ آگاہی فراوان کیر۔ اوپارے کہ پاکستان کشمیری تیکن اومیت اسے نا روشنائی ئس و مریک۔
