وزیراعظم آزاد کشمیر راجہ فاروق حیدر نا قومی کشمیر کانفرنس آن تران

اِرالکھ کشمیری آجوئی نا جہداٹی تینا جان تے ندر کرینو، دہ ہزار ازالبول نا عصمت دری، دہ ہزار چناتے چوری، ہزار آ کشمیری تے بینائی آن محروم کننگا
اسلام آباد۔ 18 ستمبر (اے پی پی) آزاد کشمیر نا وزیراعظم راجہ فاروق حیدر پارینے کہ 72سال آن کشمیریک دا آزمائش آتون مون تننگ ءُ، تدوک آ 44دے آن مقبوضہ کشمیر نا خلقت ءِ بندی کننگانے، دہ ہزار زالبول نا عصمت دری و دہ ہزار چناتے چوری کننگا، جہد آجوئی ٹی ہر کشمیری تینا آخیریکو دم اسکان جنگ کیک۔ داخیال آتا درشانی ءِ چارشنبے نادے آ قومی کشمیر کانفرنس آن تران کرسا کرے۔ اوپارے کہ تدوک آ 44دے آن مقبوضہ کشمیر نا خلقت ءِ بندی کننگانے۔ 72سال آن کشمیریک دا آزمائش آتون مون تننگ ءُ۔ اِرالکھ کشمیری آجوئی نا جہد اٹ تینا جان تے ندر کرینو۔ اوپارے کہ دہ ہزار زالبول نا عصمت دری و دہ ہزار چناتے چوری کننگا۔ ہزار آ کشمیری تے بینائی آن محروم کننگا۔ کشمیر آن پد بھارت نا مون نا نشانہ پاکستان ءِ۔ کشمیریک بقاء کن جنگ کننگ ءُ۔ اوپارے کہ علاقائی ءُ جھیڑہ اس اف نئے اِراملک آتا تہہ نا معاملہ سے دا لکھ آ خلقت نا زند آتا ویل ءِ، جہد آجوئی ٹی ہر کشمیری تینا آخیریکو دم اسکان جنگ کیک۔ راجہ فاروق حیدر پارے کہ وزیراعظم پاکستان نا اقوام متحدہ نا جنرل اسمبلی ٹی مروک آ تقریر نا انتظار ءِ کننگ اُن اومیت ءِ پاکستان کشمیر نا ویل ءِ پبی وڑاٹ پیش کیک۔ اوپارے کہ کشمیر نا بارواٹی کانفرنس نا اڈتننگ آ ہڑتوم آ کنڈآتا کشمیری چیئرمین سینیٹ نا منت وار ءُ۔ داوخت اسکان مقبوضہ کشمیر اٹی لکھ آ کشمیری تے شہید کننگانے۔ وزیراعظم ءِ پاریسر کہ کشمیری نا بیرک تما تو مون نا نشانہ پاکستان مریک۔ بھارت تینے ڈیہہ ٹی مون آ بروک فوجی و استعماری قوت سمجھک۔ اوپارے کہ کشمیری پاکستان نا بقاء کن جنگ کننگءُ۔ تینا ہم حساب وکتاب نا بناءِ کیر، بھارت پاکستان نا دیر تیا کوزہ کننگ خواہک۔ کشمیر پاکستان و بھارت نا نیام اٹ علاقائی تنازعہ اف۔ اوپارے کہ پاکستان جموں و کشمیر نا خلقت آ پت کے۔ کشمیری ہم پاکستان ءِ دروتننگ کپسہ۔ وزیراعظم آزاد کشمیر کانفرنس آن تران اٹی خنک خڑینکی مرسا پارے کہ مقبوض ہ کشمیر نا خلقت پاکستان نا کنڈاہُننگ ءُ۔ نن سلتون تو ولدا نما وجود ہم سوج انا نشان اس مریک۔ وزیراعظم آزاد کشمیر پارے کہ پاکستان کشمیری تا آجوئی نا ضامن ءِ۔ ننے تینا فوج آ پورو یخین ءِ۔ داڑے بیرہ فوج آخا خلقت ہم جنگ کیک۔ ایٹم بمب انا ذکر ءِ کرسا تینا نزوری نا درشانی ءِ کپبو۔ اوپارے کہ ذلت اٹ زند ءِ تیر کنگ غٹ آن بھلا سزاءِ۔ وخت ترندی اٹ دوتیان پیش تمسا ہِننگ ءِ۔ آتش چنار کسک تو مقبوضہ کشمیر نا چناو بزرگ آک نمے بشخپسہ۔ اخلاقی، سیاسی و سفارتی مخ تفی نا وخت تدینگا۔ اوپارے کہ داسہ عملی گام گیج ہرفنگ نا وخت ءِ۔ نن میر جعفر و میر صادق نا وڑاٹ تینا پن ءِ نوشتہ کرفپنہ۔