پاکستان کشمیری الس ءِ بچفنگ کن پین پبی گام گیج کیک، وزیر مملکت پارلیمانی امور علی محمد خان نا نجی ٹی وی چینل تون گپ وتران

اسلام آباد۔ 18 ستمبر (اے پی پی) وزیر مملکت پارلیمانی امور علی محمد خان پارینے کہ پاکستان کشمیری الس ءِ بچفنگ کن پین پبی گام گیج کیک، کشمیر نا ویل ءِ جہانی کہول آ تالان کننگک و مقبوضہ کشمیر اٹی الس آ کروک آ بھارتی بیدادی ءِ ہرحال اٹ بے نقاب کننگک۔ نجی ٹی وی چینل تون گپ و تران کرسا وزیر مملکت پارے کہ بھارت داہیت آن آگاہ ءِ کہ پاکستان کشمیر نا ویل آ ہچ ءُ حالیت اسے ٹی سمجھوتہ کپک۔ پاکستان کشمیر نا ویل ءِ کشمیری الس نا است خواہی تار داٹ ایسر کننگ کن ہمیشہ تیار ءِ۔ اوپارے کہ کشمیر نا ساڑی حالیت آک بے کچ خطرناک حد اسسکان سرمسنو، الس ءِ ہموڑے خور، دوائی و ایلو زند انا گرج انا گڑاتسکان رسینگ تفننگ انگ ءِ۔ علی محمد خان پارے کہ پاکستان نا سفارتی کوشست آتے ٹی جہانی برادری مقبوضہ کشمیر اٹی بھارتی جارحیت نا نوٹس ءِ ہلکونے۔ بھارت بیدادی نا کمک اٹ کشمیری الس نا توار ءِ توننگ اٹ پورو وڑاٹ بے سہب مسنے۔ وزیر مملکت پارلیمانی امور پارے کہ پاکستان امن پسند ءُ ملک اسے و ہر معاملہ ءِ ہیت وگپ انا کمک اٹ ایسر کننگ خواہک، پاکستان نا کنڈآن مخلصانہ ہیت وگپ نا پیش کش نا بھارت ہمیشہ منفی ورندی تس۔ اوپارے کہ پاکستانی قوم ہروڑنا بھارتی جارحیت نا پبی ورندی ءِ تننگ کن ہمیشہ تیار ءِ، وزیراعظم عمران خان جہانی کہول آ کشمیر کاز انا وکالت ءِ کشمیر نا اسہ سفیر اسے نا حیثیت اٹ کننگ ءِ۔