الیکشن کمیشن مسلم لیگ (ن) نا نائب صدر مریم نواز ءِ عہدہ غان اینک کننگ نا درخواست ءِ مسترد کرے

چیف الیکشن کمشنر جسٹس (ر) سردار محمد رضا نا کماشی ٹی مسہ باسکی بنچ گونڈ ءُ فیصلہ اس بنفے
اسلام آباد۔17 ستمبر (اے پی پی) الیکشن کمیشن مسلم لیگ (ن) نا نائب صدر مریم نواز ءِ (ن) لیگ انا نائب صدارت آن اینک کننگ نا درخواست ءِ مسترد کرے و اودے مشروط وڑاٹ دا عہدہ ءِ تخنگ نا موکل تس ولے او سزا چٹنگ اسکان صدر، قائم مقام صدر یا مسلم لیگ (ن) نا صدارت نا اختیار ءِ کاریم اٹ اتنگ کپک۔ چیف الیکشن کمشنر جسٹس (ر) سردار محمد رضا نا کماشی ٹی مسہ باسکی بنچ سے شنبے نادے آ گونڈ ءُ فیصلہ اس بنفے۔ مریم نواز نا پارٹی عہدہ نا برخلاف تحریک انصاف نا قومی اسمبلی نا باسک ملیکہ بخاری و ایلوفک الیکشن کمیشن اٹی درخواست دائرکریسر ہراڑا فیصلہ ءِ دوشنبے آ ڈک کننگا ہرادے سے شنبے نادے آ بنفنگا۔ الیکشن کمیشن فیصلہ ٹی پارے کہ مریم نواز نائب صدارت نا عہدہ ءِ مشروط وڑاٹ تخنگ کیک۔ اگہ پارٹی صدر نا عہدہ خورک مرے تو مریم نواز اختیار آتے کاریم اٹ اتنگ کپک۔ او قائم مقام صدر ہم مننگ کپک۔ (ن) لیگ نا نائب صدارت نا عہدہ بظاہر غیر فعال ءِ ہنداخاطران دا عہدہ ءِ تخنگ مریک۔ داکان پد میڈیا تون گپ و تران کرسا مسلم لیگ (ن) نا وکلاء ظفر اللہ خان و ایلوفک پاریر کہ الیکشن کمیشن مریم نواز نا پارٹی نائب صدرنا عہدہ ءِ تخنگ نا برخلاف پٹیشن خارج کرے۔ پارٹی منشور نا رداٹ مریم نواز نائب صدر مریک۔ تحریک انصاف نا اسمبلی نا باسک آک دا عہدہ غان اینک کننگ نا بابت الیکشن کمیشن اٹی پٹیشن دائر کریسر۔ ذوالفقار علی بھٹو نا دور اٹی دا پابندی ءِ چٹفنگاسس۔