مودی سرکار تینا جنگی گنوکی نا سوب آن مچ آ دنیا ٹی تنیا مننگ ءِ، وزیر دفاع پرویز خٹک نا میڈیا تون گپ وتران

اسلام آباد۔ 17 ستمبر (اے پی پی) وزیر دفاع پرویز خٹک پارینے کہ مودی سرکار تینا جنگی گنوکی نا سوب آن مچ آ دنیا ٹی تنیا مننگ ءِ، مقبوضہ وادی ٹی بھارتی فوج انا ظلم و جبر انا برخلاف غٹ مہذب واکدار وانسانی حق انا تنظیمک ہیت کننگ نا بناءِ کرینو۔ داخیال آتا درشانی ءِ او سے شنبے نادے آ پارلیمنٹ ہاؤس نا پیشن میڈیا تون گپ و تران کرسا کرے۔ پرویز خٹک پارے کہ پاکستان نا سلہہ بند فوج و الس اسٹ ءُ، سیم تیا ہروڑنا بھارتی جارحیت نا برخلاف پبی ورندی تننگ کن ہروخت تیار ءُ۔ اوپارے کہ مودی بھارتی سیکولرازم نا دروشم ءِ بے وڑمسخ کرینے، مچ آ دنیا سمجھک کہ سیکولرازم نا بھارتی ڈرامہ نا پد اٹ نریندر مودی سرکار نا انتہاپسندی اودیم ءِ و دا ملک ہندوتیا بیدس ایلوفتے کن رہینگ انگ کن تنگ کننگانے۔ اسہ سوج اسے نا ورندی ٹی اوپارے کہ مقبوضہ کشمیر اٹی فوجی کارروائی تیان ظلم و بربریت نا پوسکن ءُ ریکارڈ اس جوڑ مسنے ہراڑادنیا واتوڑ کننگ ءِ، مظلوم کشمیری تیکن جہانی کہول آ ہیت مننگ بناکرینے و مودی سرکار ءِ دے انا دے اس کشمیری تا حق انا مو ن آ تینے شیف کروئی تمک۔