وزیراعظم عمران خان نا کماشی ٹی نیو بالا کوٹ سٹی پروجیکٹ آ پیش رفت انا جاچ ءِ ہلنگ نا بابت دیوان

نیو بالاکوٹ سٹی پروجیکٹ اٹی پبلک پرائیویٹ پارٹنر شپ انا ماڈل ءِ تینا کننگ، ڈٹ انا پوروی کن داڑتون وابستہ کلیم آتا ویل ءِ اولیتی بنداو تیا ایسر کننگ نا پارت
اسلام آباد۔ 16ستمبر (اے پی پی) وزیراعظم عمران خان نیو بالاکوٹ سٹی پروجیکٹ اٹی پبلک پرائیویٹ پارٹنر شپ انا ماڈل ءِ تینا کننگ ناپارت کرسا پارینے کہ ڈٹ انا پوروی کن اوڑتون وابستہ کلیم تا ویل ءِ اولیتی بنداو تیا ایسر کننگے، پوسکن آ شار تینا است چکوک محل و وقوع نا سوب علاقہ ٹی سیل و سوات ءِ مون آ دننگ نا ذریعہ مریک۔ او دوشنبے نادے داڑے نیو بالاکوٹ سٹی پروجیکٹ آ پیش رفت نا جاچ ءِ ہلنگ نا بابت دیوان نا کماشی ءِ کریکہ۔ دیوان اٹی بنجائی وزیر ڈٹ بندی مخدوم خسرو بختیار، بنجائی وزیر ریونیو حماد اظہر، چیئرمین این ڈی ایم اے لیفٹیننٹ جنرل محمد افضل، چیف سیکرٹری خیبر پختونخوا محمد سلیم و ایلو سینئر کمامدارآک ہم ساڑی ئسر۔ وزیر اعظم ءِ نیو بالاکوٹ سٹی نا ڈٹ و دابابت مون تروک کانودی، انتظامی و مالیاتی ویل آتا ایسری نا بارواٹی حوال تننگا۔ داوخت آ پوسکن آ شار ءِ سیل و سواتی مرکز و نہادی خل تا کانڑ کنی نا ہندی صنعت کن پوسکن آ کاروباری شار اٹی بدل کننگ نا حکمت عملی نا ہم جاچ ءِ ہلنگا۔ وزیراعظم تعطل نا گواچی دا ڈٹ انا بحالی نا کوشست آتا ستاءِ کرسا پارے کہ پوسکن آ شار انا لوکیشن ہندی و درملکی سیل و سواتی تے چکنگ نا بھلو لائخی اس تخک داوڑ دا شار قومی جی ڈی پی ٹی نمان کڑد اس ادا کننگ کیک۔ اوملک انا سیل و سوات نا بشخ اٹی ساڑی بے پناہ لائخی تے کاریم اٹ اتنگ نا گرج آ زور شاغسا پارے کہ چندی سیل و سواتی ہند آتیا سیل و سواتی ہند آتے شون تننگ آن نئے بیرہ ملک انا سیل و سواتی لائخی ءِ تالان کننگ اٹ کمک رسینگک بلکن داڑان خلقت کن روزگار نا ہم وارخواہی دوبریک۔ وزیراعظم پارت کرے کہ دا چرجوئی ٹی پوسکن آ شار انا شونداری ٹی پبلک پرائیویٹ پارٹنر شپ انا ماڈل ءِ بایدے تینا کننگے۔ اوپارے کہ ڈٹ انا پوروی کن اوڑتون وابستہ کلیم تا ویل ءِ اولیتی بنداو تیا ایسر بایدے کننگے۔