اولیکو وار حکمران تا جاگہ غا قومی کٹیا ودنگ ءِ، کرنٹ اکاؤنٹ نسخان اٹی 73%کمتی بھلو سرسہبی اسے

وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا ٹویٹ
اسلام آباد۔ 16 ستمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ الس نا شونہالی و شونداری کن حکومتی گام گیج آتا بھرم مون آ بننگ بناکرینے، وزیراعظم عمران خان نا کماشی ٹی معاشی اصلاحات نا ایجنڈا غا کاربند و اقتصادی حالیت آتے ٹی گچینی نا کنڈاروان ءِ، خراج ریونیو ءِ ودفنگ و مالیاتی نسخان ءِ کنٹرول کننگ ننا اولیت ءِ۔ دوشنبے نادے آ تینا ٹویٹ اٹی ڈاکٹر فردوس عاشق اعوان پارے کہ حکومت اینخو مالی سال انا اولیکو اِراتُو اٹی تدوک آ سال انا 509 ارب نا مقابلہ ٹی 580 ارب روپئی خراج جمع کرے، ایف بی آر اٹی 6لکھ پوسکن خراج تروک آتا ودکی مس۔ داسرسہبی نا سہرا عمران خان نا کاٹم آٹے، ہراپاکستان اٹی اولیکو وار خراج ہلنگ نا فرض ءِ قومی تحریک نا دروشم اس تس۔ اولیکو وار حکمران تا جاگہ غا قومی خزانہ نا کٹیا ودنگ ءِ۔ ڈاکٹر فردوس عاشق اعوان پارے کہ دا ملک و قوم و معیشت کن خوشخبری اسے، اِراسیلولر کمپنی تیان لیسن فیس انا مد اٹی 70 ارب روپئی وصول مس، اسہ پین کمپنی اسے آن پین 70 ارب وصول مننگ نا اومیت ءِ، داسیکٹر آن جم وڑاٹ 200 ارب روپئی دوئی مریک۔ ڈاکٹر فردوس عاشق اعوان پارے کہ کرنٹ اکاؤنٹ نسخان اٹی 73درسد کمتی یقینا اسہ بھلو سرسہبی اسے، برآمد آتے ٹی ودکی و درآمد آتے ٹی پیدوار کمتی بس،ملک اٹی معاشی سرجزآتا مون آ دننگ و کاروباری تپہ کن آسانی ودی کننگ کن کوشست کننگ ءِ۔ اوپارے کہ حکومت تینا خڑچ آتے کم کرینے اِرا تُو اٹی ہچ ءُ سپلیمنٹری گرانٹ اس منظور متنے وخت اس کہ تدوک آ منہ ہفتہ ٹی کرنسی نا قدر گچین مننگ آن حکومت ءِ 246ارب روپئی نا بچت مسنے۔ ڈاکٹر فردوس عاشق اعوان پارے کہ داسال حکومت کم و ود اسہ ہزار ارب روپئی نان خراج ریونیو یکجا کننگ اٹ سرسہب مریک ہراٹی دوسد ارب روپئی سیلولر سیکٹر، چارسد ارب روپئی اسٹیٹ بینک آف پاکستان نا منافع جات و مسہ سد ارب روپئی آر ایل این جی پلانٹ آتا نجکاری آن ملنگ نا اومیت ءِ۔