وزیراعظم آزاد کشمیر نا لین آف کنٹرول آ بھارتی بے خار گولہ باری و سم کاری آن زہمی کھوئی رٹہ، تتہ پانی و نکیال سیکٹرآتا دورہ

اسلام آباد۔ 16ستمبر (اے پی پی) وزیراعظم آزاد کشمیر راجہ فاروق حیدر خان لین آف کنٹرول آ بھارتی بے خار گولہ باری و سم کاری آن زہمی کھوئی رٹہ، تتہ پانی، نکیال سیکٹر آتا دورہ ءِ کرے۔ داوخت آ مچی آن تران کرسا وزیراعظم آزاد کشمیر پارے کہ مودی و اونا مخ تف آتا متحدہ ہندوستان نا نظریہ نا کسر اٹی پاکستان اڑاند ءِ، پاک فوج اتون اواری اٹ متکن آ حساب ءِ ہم بھارت آن الینہ۔ سرجم حوال آتارداٹ راجہ فاروق حیدر خان کنٹرول لین نا سیکٹر تتہ پانی و نکیال نا دورہ ءِ کرے۔ داوخت آ او پارے کہ کنٹرول لین آ رہینگوک آ بہادر کشمیری تے سلام پیش کینہ۔ پاک فوج ننا مان ءِ، کشمیریک پاک فوج اتون ہم کوپہ ءُ، کنٹرول لین آ رہینگوک آ بندغ آتے کن بنجائی حکومت نا کمک اٹ ڈٹ منظور مسنے،بھارت اگہ جارحیت کرے تو آزاد کشمیر ءِ بھارتی فوج انا قبرستان اس جوڑ کینہ، بھارت جنگ مسلط کرے تو پاک فوج ہم کوپہ جنگ کینہ۔ کنٹرول لین آ رہینگوک آ بندغ آتا حوصلہ وجوزہ غاتے سلام پیش کینہ، اوفتے ہروڑنا آسراتی فراوان کینہ، اوپارے کہ تدوک آ دے ہم لین آف کنٹرول آ بھارتی سم کاری آن اسہ نیاڑی اس شہید وخت اس کہ 8 بندغ ٹھپی مسر۔ کنٹرول لین نا دورہ ءِ کننگ نا مسخت داڑے سلوک آتے سلام پیش کننگ و اوفتا حوصلہ ءِ داد تننگ ناءِ وخت اس کہ اوفتا ویل آتیان آگاہی دوئی کننگ نا ءِ۔ کشمیری تا عزم آجوئی ہندوستان ءِ سرفک۔ اوپارے کہ مقبوضہ کشمیر نا معاملہ غا آزاد کشمیر نا سیاسی سرکڑدہ غاک اسہ پلیٹ فارم آٹو۔ بھارتی فوج لین آف کنٹرول آ سنائپر گن اٹ کودک چناتے نشانہ کیک، ننا دشمن بھاز پست ذہنیت نا حامل و لغور ءِ۔ اوپارے کہ ای ہم آجوئی نا قافلہ ٹی ادنیٰ سپاہی اُٹ ہراتم وخت برے تو غٹ آن مون مریوہ۔