اسلام آباد۔ 13 ستمبر (اے پی پی) وزیر خارجہ شاہ محمود قریشی پارینے کہ ملکی تاریخ اٹی اولیکو وار ساڑی حکومت جہانی کہول آ کشمیر نا ویل ءِ ہراوڑاٹ ہرفینے داڑان بھارت ءِ سلامتی کونسل، یورپی یونین و جنیوا تون اوار چندی فورم تیا سبکی تون مون تروئی تمانے، اپوزیشن ءِ دامعاملہ غا بایدے ہچ وڑنا گڑتی مف، پروڈکشن آرڈرز نا معاملہ غا اپوزیشن ءِ عدالت آ ہِننگ نا حق ارے ولے دابابت ہچ ءُ ہیت اس بایدے اسپیکر چیمبر اٹ مف، نن بنجا پاکستان و بنجائی اکائی تا سوگوی آ باور کینہ، صوبائی وتواجہی آ ہچ ءُ آنچ اس اتپنہ، صوبائی حکومت تون چھیڑ چھاڑ نا ہچ ءُ ارادہ اس اف، وزیر کانود تینا بیان نا وضاحت ءِ کرینے ’اپوزیشن نا گڑتی بایدے چٹوسس، بلاول بھٹو سیاست اٹ پوسکن ءِ، سیاسی دباؤ ٹی برسا اودے سندھو دیش انا ہیت ءِ کننگ زیب تفک، ملک اٹی ہچ ءُ جاگہ اس صوبائی تعصب اف۔ جمعہ نادے قومی اسمبلی ٹی گپ و تران کرسا وزیر خارجہ شاہ محمود قریشی پارے کہ کنے وضاحت بٹنگ انگانے کہ ای انٹرویو اسے ٹی پارینٹ کہ مقبوضہ جموں و کشمیر بھارت نا بشخ ءِ۔ اوپارے کہ ایوان ءِ داہیت آ است جمی مرے کہ داوخت اسکان نن انتس کہ کرینن اوڑان ساف پاش مریک کہ کنا و مچ آ پاکستان نا موقف اسہ وڑ مسنے۔ بھارت ءِ جہانی کہول آ دا حالیت آتے ٹی تاریخی سبکی تون مون تروئی تما۔ یورپی یونین، اسلامی ملک آک دنیانا 158 ملک آک اللہ نا فضل و کرم اٹ ننا موقف ءِ امنا کرینو۔ تدوک آ دے امریکی کانگریس نا چار سینیٹرز صدر ٹرمپ ءِ چھٹی نوشتہ کرینو کہ کشمیر نا ویل بے کچ سنگین ءِ ہنداخاطران امریکی صدر نیام تمے۔ یورپی یونین نا ملک آک ہم دا بابت چھٹی لکھانو۔ 17 ستمبرآیورپی یونین پارلیمنٹ اٹی کشمیر نا ویل ءِ چست کننگک۔ وزیراعظم عمران خان ءِ اللہ دا شرف ءِ تسنے کہ کشمیر نا ویل ءِ مچ آ دنیا ٹی ہرفنگانے۔ نن سندھ اسمبلی نا مستین نا کڑد ءِ امنا کینہ۔ نن بنجا پاکستان آ باور کینہ۔ صوبائی وتواجہی آ ہچ ءُ آنچ اس اتپنہ۔ صوبائی حکومت آتون چھڑ چھاڑ نا ہچ ءُ اراد ہ اس اف۔ وزیر کانود تینا بیان نا وضاحت ءِ کرینے۔ اپوزیشن نا گڑتی بایدے چٹوسس۔ اوپارے کہ بلاول بھٹو داسہ سیاسی سفر نا بناءِ کرینے سیاسی دباؤ ٹی برسا اوڑکن سندھو دیش انا ہیت ءِ کننگ درست اف۔ پیپلزپارٹی صوبائی تعصب ءِ دفن کرینے و مدام بنجانا ہیت ءِ کرینے۔ داپارٹی نا ساڑی آ چیئرمین ءِ سندھ کارڈ انا کاریم اٹ اتنگ زیب تفک۔ سندھو دیش و پختونستان نا ہیت ءِ کروک آک دفن مسنو۔ سندھ انا اسہ اسہ شاری بنجاپاکستان تون تفک۔ ملک اٹی ہچ وڑنا صوبائی تعصب اس اف۔ نن مہاجر آتا ہم پاکستان کن قربانی تے امنا کینہ۔ پروڈکشن آرڈر نا بابت اپوزیشن اسپیکر نا موقف آن بایدے اتفاق کے۔ چیئرنا بابت معاملہ غاتے مدام اسپیکر چیمبر اٹ ہرفنگ نا روایت ءِ۔ ہچ کس اوفتے توتنے، عدالت آ ہِننگ نا اوفتے حق دوئی ءِ۔ صدر نا تران نا وخت آ اپوزیشن نا برانز آن داتاثر بس کہ اپوزیشن کشمیر نا ویل آ پروڈکشن آرڈرز ءِ اولیت تسنے۔ اوپارے کہ جمہوریت نا زیبائی دادے کہ ننے اسہ ایلو تون اوار چلینگوئیءِ۔
