اسلام آباد۔ 13ستمبر (اے پی پی) بنجائی وزیر مواصلات مراد سعید پارینے کہ نیشنل ہائی وے اتھارٹی تینا روڈ نیٹ ورک آ بیرہ ٹول ریونیو یکجا کننگ ءِ، لنک روڈ، کٹور این ایچ اے نا روڈ نیٹ ورک نا دنگ اٹ بفک۔ جمعہ نادے آ قومی اسمبلی ٹی وقفہ سوج آتے ٹی جام عبدالکریم بخار نا سوج انا ورندی ٹی بنجائی وزیر مواصلات مراد سعید پارے کہ حیدر آباد نا خڑک موٹروے نا سروس روڈ ءِ نوکاپ آن نسخان رسینگانے۔ کراچی، حیدر آباد موٹروے نا کیہی بشخ آتے سیلاب آن نسخان رسینگانے۔ دانا چاروکی ءِ کرساکینہ۔ کراچی حیدر آباد موٹروے ءِ سہی وڑاٹ موٹروے پاننگ مفک۔ داشاہراہ ٹی ننے بجلی نا کھمبہ و رکشہ نظر بریک۔ داڈٹ ءِ جوان وڑاٹ پورو کننگتنے۔ ساڑی حکومت دا معاملہ ءِ ایسر کننگ ءِ۔ مولوی عصمت اللہ نا ضمنی سوج آ اوپارے کہ ژوب کوئٹہ، ڈی آئی خان شاہراہ ننا اولیت ءِ۔ ژوب کچلاک روڈ انا وزیراعظم بناءِ کرینے۔ بروک آ مرحلہ غاتے سی پیک اٹ اوار کننگانے۔ اوپارے کہ تدوک آ حکومت تو دیکی روٹ انا بیرہ پڑو ءِ کریسس وزیراعظم عمران خان نا کماشی ٹی تحریک انصاف نا حکومت دیکی روٹ ءِ عملی دروشم اس تننگ ءِ۔
