کوءٹہ ۔ 22 اگست (اے پی پی) گورنر بلوچستان امان اللہ خان یاسین زئی پارینے کہ انسانی تہذیب نا بنا آن ہلیس سائنس اینڈ ٹیکنالوجی نا دا ترند رفتار و شون ہلوک دور اسکان انسانی حق و بریبری انسانی وقار نا رکھ غٹ سیاسی، معاشی ، علمی و راجی سرجزآتا محور و مرکز مسنے ولے دا بنداوی مسخت نا دوئی کننگ کن انفرادی و اجتماعی شعوری کوشست آک داسہ ہم برجاءُ ۔ انسانی حق غٹ انسان تیکن ءِ و الس ءِ اسہ وڑ حق و بریبر شونداری نا وارخواہی فراوان کننگ ہی جمہوریت نا زیبائی ءِ،داخیال آتا درشانی ءِ او پنچ شنبے نادے آ گورنر ہاءوس کوءٹہ ٹی انسانی حق کمیشن پاکستان نا سروک آئی اے رحمان نا کماشی ٹی اسہ ڈل اسے تون گپ وتران کرسا کرے ، اوڑدہی ٹی صوبہ ٹی انسانی حق انا السی حالیت، معدنی کانڑ آتیٹی ودک آ شکست، بڑزکو تعلیمی ادارہ غاتے ٹی پرامن تعلیمی چاگڑد ءِ مون آ دننگ و السی شونداری ڈٹ آتیا گپ و تران کننگا ۔ داوخت آ گورنر بلوچستان پارے کہ پاکستان اسہ جمہوری و فلاحی ریاست نا تصور نا رداٹ جوڑ مسنے وپاکستان نا آئین غٹ شاری تا بنداوی حق انا رکھوک ءِ ۔ اسہ سوج اسے ناورندی ٹی گورنر پارے کہ ساڑی حکومت الس نا برخلاف واک انا کاریم اٹ اتنگ آ باور کپک ولے کانود نا بالادستی ءِ برجاتخنگ، راج اٹی خوف و بھیم تالان کروک آ عنصر آتے ماس کش کننگ و دہشت و حشت آ مبنی ذہنیت نا چٹفنگ کن وخت وخت اس المی کانودی کارروائی کروئی تمک ۔ گورنر بلوچستان پارے کہ حکومت نا الس دوست پالیسی تا سوب صوبہ نا جم اٹنگا حالیت آتیٹی بھاز گچینی بسنے ۔ گورنر دا باوری نا درشانی ءِ کرے کہ دیر پا شونداری وخاص کر انسانی حق انا پاسداری ءِ المی کننگ کن چست کروک گام گیج آتا مثبت و تعمیری زہم تمک ۔
