اسلام آباد۔21اگست(اے پی پی) دری کارانی وزیر شاہ محمود قریشی ءَ چارشمبےء ِ روچءَ ڈنمارک ءِ دری کارانی وزیر جیپی سباسچین کوفوڈ ءَ گوں ٹیلیفون ءَ گپء ُتران کتگ۔ دوئیں راہشوناں مقبوضہ کشمیر ءِ جاورھالانی سرءَ حیالء ُلیکہ ءِ درشانی کتگ ء ُ اے ہوالگءَ دونیمگی شورء ُترانء ُ نزیکی ءَ را برجم دارگءِ سرءَ تپاک کتگ۔ دری کارانی کارگسءِ جارچین ءِ گشگءِ ردءَ دری کارانی وزیر شاہ محمود قریشی ءَ ڈنمارکءِ دری کارانی وزیر ءَ مقبوضہ جموں ء ُ کشمیر ءِ حاسیں ارزشت ہلاس کنگء ِ ہندوستانءِ یک نیمگی گامگیجءَ چہ سرپد کتگ۔ آئیءَ گشتگ کہ ہندوستان ءَ تاں پنچ اگستءَ چہ مقبوضہ جموں ء ُ کشمیر ی آناں کرفیوءِ سوبءَ بندی جاہ کتگ ء ُ بھارت کشمیرءَ انسانی حقانی حلاپ ورزی ءَ روچ پہ روش گیش کنگ ءَ اِنت۔ دری کارانی وزیر شاہ محمود قریشی ءَ گشتگ کہ آ کشمیری آنی جیڑ ھء ُ جنجالاں ہلاس کنگء ُ مقبوضہ کشمیرءَ کرفیو ءِ ہلاس کنگءَ وتی کردءَ پیلو بہ کنت۔ ڈینش دری کارانی وزیر ءَ گشتگ کہ ما اے گپءِ سرءَ تپاک کناں کہ دو ایٹمی زوراکانی نیامءَ کستء ُکینگ خطرناک بوت کنت۔ آئیءَ گشتگ کہ ما اے جیڑہ ءِ سرءَ چارء ُ بچار کنگءَ اَنت ء ُآئیءَ اے جیڑہءَ را سولء ُ ترانءِ وسیلگءَ چہ گیشء ُ گیوار کنگءِ سرءَ زورپر داتگ۔ ڈنمارک ءَ را اے سرجمیں جاورھالانی سرءَ تکانسری اِنت، جیڑہء ُ جنجال پہ سولء ُ تران ءَ چہ گیشء ُ گیوار کنگ بہ بنت۔ دری کا رانی دوئیں وزیرآں اے ہوالگءَ دونیمگی سولء ُتران ء ُ نزیکی ءَ را برجم دارگءِ سرءَ تپاک کتگ۔
