اسلام آباد۔ 21اگست (اے پی پی) بنجائی وزیر کانود و انصاف ڈاکٹر فروغ نسیم پارینے کہ دیوانی مقدمہ غاتا فیصلہ غاک داسہ اسٹ آن یک و نیم سال اٹی مریک، کمک نا چاری زالبول و چناتے کن خصوصی ایکشن پلان اس تیار کننگانے، میرات نا سرٹیفکیٹ 15دے انا تہہ ٹی جاری کننگک، وسل بلور نا رداٹ معلومداری تروک آءِ 20 درسد تننگک۔ 844کانود وزارت نا ویب سائٹ آ اپ لوڈ کننگانے۔ چارشنبے نادے آ پی آئی ڈی ٹی وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان و پارلیمانی سیکرٹری کانود ملیکہ بخاری تون اوار پریس کانفرنس آن تران کرسا بنجائی وزیر کانود بیرسٹر فروغ نسیم پارے کہ عدالتی معاملہ غاتابابت ترمیمی بل ءِ قائمہ کمیٹی پاس کرینے۔ اوپارے کہ 40,30سال تیٹی مروک آ فیصلہ غاک داسہ اسٹ آن یک ونیم سال اٹی مریرہ۔ ترمیمی بل انا مسودہ پاکستان ڈاٹ جی وری ڈاٹ پی کے آ ساڑی ءِ، داسہ پاکستان نا قوانین ویب سائٹ آ ساڑی ءِ۔ اوپارے کہ دیوانی مقدمہ غاتا فیصلہ داسہ اسٹ آن یک و نیم سال اٹی مریک، کمک نا چاری زالبول و چناتیکن خصوصی ایکشن پلان اس تیار کننگانے، پوسکن آ کانود نا رداٹ زالبول آک تینا میرات آتے آسانی اٹ دوئی کننگ کیرہ۔ میرات نا سرٹیفکیٹ 15دے انا تہہ ٹی جاری کننگک ہراٹی داکان مست 5آن 6سال لگاکہ، وسل بلور نا رداٹ معلومداری تروک آءِ 20 درسد تننگک۔ اوپارے کہ 844 قوانین وزارت نا ویب سائٹ آ اپ لوڈ کننگانے۔ وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارے کہ تحریک انصاف پاکستان نا تقدیر ءِ بدلیفنگ کن اقداراٹی بسنے و چندی بشخ آتے ٹی دوررس اصلاحات درستی راستی کرفنگ انگ ءِ۔
